Jens-Frederik Nielsen: Iligiit akornanni alapernaarsuineq akuersaarneqarsinnaanngilluinnarpoq
Naalakkersuisut siulittaasuat, Jens-Frederik Nielsen (D) alapernaarsuisoqarsinnaanera pillugu suliamut uissuumminartumut maanna qisuariaateqarpoq.
Amerikami isertortumik paasiniaasartut, soorlu CIA-p NSA-llu, aqutsisui Kalaallit Nunaanni alapernaarsuiartortitseqqullugit USA-p præsidentiata Donald Trumpip peqqusimagai, ullut marluk matuma siorna USA-mi tusagassiorfiup Wall Street Journalip qulaarpaa.
- Pissutsit suli taamaapput, suli nunarput ataqqineqarnerunissamik ujartuinera allanngornikuunngilaq, taava iligiit akornanni misissuisarnerit allallu maannakkut tusakkagut maannakkut ingerlanneqartut soorunami akuersaarneqarsinnaanngillat, Jens-Frederik Nielsen KNR-imut oqarpoq.
Amerikamiut aviisianni paasissutissat pissutigalugu danskit nunanut allanut ministerip, Lars Løkke Rasmussenip amerikamiut aallartitaat Nunanut allanut ministereqarfimmut oqaloqatiginiarlugu aggersarpaa. Ataatsimiinneq ullumi pivoq, tassanilu naalakkersuisunit aamma peqataasoqarluni.
Jens-Frederik Nielsen ataatsimiinnermi suut oqaluuserineqarpat?
- Soorunami oqaluuserineqarsimasut oqaatigisinnaanngilara, kisianni erseqqissarneqarpoq nunatsinninngaanniit suut pingaarnersut tassa iligiit akornanni misissuinerit allalu akuersaarneqarsinnaanngilluinnarput, taanna oqarpoq, nangillunilu:
- Aamma soorunami erseqqissarusupparput nunarput eqqartorneqassatillugu nunarput tamatigut peqataasussaavoq. Taamaammat avammut oqariartorneq namminerisamik ataatsimeeqateqarnissamik soorunami uggornartuuvoq, nunarput pineqartillugu nunarput tamatigut peqataassaaq.
Illuttut ataqqeqatigiinnissaq kissaatigigaa
Pisoq pillugu konservativeneersup, Rasmus Jarlovip amerikamiut Nuummi sinniisoqarfiata matuneqarnissaa kaammattuutigaa. Tamannalu nunatsinni oqaluuserineqartariaqartoq,
Inatsisartuni nunanut allanut sillimaniarnermullu ataatsimiititaliami siulittaasoq, IA-meersoq, Pipaluk Lynge aalajangiisinnaagaluaruni sinniisoqarfik matusariaqarnersoq imaluunniit allatigut iliuuseqartoqartariaqarnersoq nunatsinni politikerit oqaluuserisariaqarpaat.
Jens-Frederik Nielsenili aperigaanni taassuma akissutaa ersarippoq. Taassuma sinniisoqarfiup matuneqarnissaa itigartitsissutigaa.
- Isumaqarpunga oqallinnerit tamakkua maannakkut tulluarpallaanngitsuusut. Soorunami USA-mut tunngatillugu oqariartuutigisat taava nunatsinninngaanniit piumasaqaatit taakku piupput. Aamma attappagut.
- Sakkortusisamik ataqqineqarnissarput, ataqqinninnermik pissusilersorfigineqarnissarput taanna oqaatigaarput tassaniipporlu maannakkut nunatta inissisimaffia, pissutsit ataavartumik malinnaaffigissavagut, aamma taamaaliornikuuvugut piffissami sivisujaami maannakkut.
Qanimut iligisaq
Aamma danskit nunanut allanut ministeriat, Lars Løkke amerikamiut aallartitaata ataatsimeeqatiginerata kingorna naatsumik oqaaseqarpoq. Taanna Københavnimi sivikitsumik tusagassiortunut katersortitsinermi oqaaseqarpoq.
- Kunngeqarfiup inissisimaffianik erseqqarissaanissaq oqaloqatigiinermi siunertaavoq. Amerikamiut aallartitarigallagaanit tamanna ilungersunartumik tiguneqartoq isumaqarpugut, Lars Løkke oqarpoq.
USA nunatsinni alapernaarsuinermik annertusaaniarnersoq uppernarsarneqarnissaa ataatsimiinnerup siunertaraa. Ministerilli Wall Street Journalimi ilanngutassiamit paasissutissat tassani uppernarsartinngilai.
- Oqaloqatigiinnermit innersuussuteqarsinnaanngilanga. Aviisi atuakkagut ilungersunarluinnartutut isigigigut USA-mut oqaatiginissai oqatigiinnerup siunertaraa, taakkulu ilumoornersut uppernarsartinngilakka, Lars Løkke oqarpoq.
Taassuma tamatuma saniatigut amerikamiut Nuummi sinniisoqarfiata matuneqarnissaanut siunnersuut aamma itigartitsissutigaa.
- Tamanna annertoorujussuarmik aalajangiinerussaaq. Danmarkip USA qanilluinnartumik iligaa, ukiorpassuarnilu taamaalluni. Qanimut pitsaasumillu atassuteqarnissarput kissaatigaarput, danskit nunanut allanut ministeriat oqarpoq.
