Ileqqorissaarnissamut inuiaqatigiit malittarisassaqartariaqarput
Akuttunngitsunik tamanut saqqummiussisoqartarpoq ilisimatuussutsikkut Nunatsinni misissuisimanernik. Tamannalu tunngaviuvoq ileqqorissaarnissamik siunnersuisooqatigiinnik pilersitsinissamik malittarisassiortoqarnissaanillu pisariaqartitsineq pillugu oqallittoqalerneranut.
- Ukiualuit matuma siorna oqallisaaleraluarpoq nunatsinni ileqqorissaarnissaq pillugu eqqarsaqatigiinnik pilersitsisoqassoq. Uanga eqqarsartaasera malillugu pisariaqarpoq ilisimatusarnermi ileqqorissaarnissamut malittarisassanik nunatsinni peqalernissaa. Tassunga assersuutissaqanngikkaluarpunga, kisianni isumaqarpunga inuiaqatigiit eqqarsaatigilertariaqaraat ileqqorissaarnissamut malittarisassaqalernissaa, Carl Christian Olsen oqarpoq.
Oqallinnerup aallartinneranut pissutaavoq eqqarsaat manna pillugu innuttaasut isummersoqataatinnissaat siunertaanngilarlu ilisimatuussutsikkut matuma ingerlannissaa. Kikkut tamarmik peqataanissamut periarfissinniarneqarput.
- Ileqqorissaarnissamut malittarisassat inatsisiliornermut illuatungiliuttuussaanngillat inuiaqatigiilli tamarmik iluaqutissarsiffigisinnaasariaqarpaat. Danmarkimisut ileqqorissaarnissamut siunnersuisooqatigiit ileqqorissaarnissaq pillugu siunnersuisuusinnaappata assut iluassagaluarpoq, Carl Christian Olsen oqarpoq.
