Ilaqutariit tallimassaanik kilattut: Nakorsaatissaqartinneqanngilagut
Ungillerineq. Aappaluttuaqqanik anillanneq, tinupasuaraninnerlu.
Kilakkaanni tassa misigisassat.
Nanortalimmi ilaqutariit kilannik tallimassaanik ukiup ataatsip ingerlanerani tunillatsittut, nakorsaatissaqartinneqanngillat, nakorsaatit amigarmata.
Kilallumi nunatsinni ajornartorsiutaasoq peqqinnissaqarimmiit oqaatigaat. Tamannalu ilaqutariinnut unammillernarsimaqaaq.
AAMMA ATUARUK Nuuk ramt af mindre fnatudbrud
Nanortalimmiu Marina Anthonsen nuliaavoq, pingasunillu nukangasunik meeraqarluni. Ilaqutariit kilannit siorna juuli naalerneraniilli ulloq manna tikillugu ajornartorsiuteqarput.
- Tunillatsikatalluni, qaangiinissap tungaanut angerlarsimaannarusunnaqaaq. Ajoraluartumik uagutsinnut eqqueqaaq, sulinngitsoortariaqartarluta.
Marina Anthonsen, Nanortallip atuarfiani timelæreriuvoq, ulluinnarnilu meeqqat atuartitarisarlugit.
Kilaat suuppat?
- Amerluut kilanneq paamititserujussuartarpoq.
- Kilaap inua taassumalu anaa manniilu timip akiuussutissaanut sunniiniapiloortarmata paamititsilertarput.
- Kilaat meerarpassuit inuusuttorpassuillu - soorlu meeqqerivinni atuarfinnilu - katerittut akornanni tuniluutilertorsinnaasarput.
- Kilaat tunillatsinnermiit sapaatit akunnerit pingasut qaangiukkaangata paamititsilertarput. Tunillatsissimasoq allaat aanaarneranik kinguneqartumik paamititserujussuarsinnaapput.
- Kilaap inua kialaartumiikkusunnerusarmat ullukkut paamititsingaartanngilaq, unnuakkulli qipeqarnermi tukummallutillu nalinginnalerilertarput, taamaammallu paamititserujussualertarlutik
Tusarfik: netdoktor.dk
Taanna siornali arlaleriarluni angerlarsimaannartariaqartarsimavoq atuartuutini tunillakkusunnagit.
Ilaqutariit kilannik siorna juulip naalernerani tunillatseqqaarput.
Timikkut tarnikkullu sunniuteqartoq
Marina Anthonsenip oqarnera naapertorlugu kilannik tunillatseqqaarneq eqqarsartaatsikkut imaannaanngitsumik ilaatigut sunniuteqarsimavoq.
- Kilaqaqqaalerluni kanngunartarami, nuannernani. Misigisimanarluni soorlu anaanaanerlulluni, iluamik paarsinngitsutut.
Marina Anthonsen oqarpoq. Taamatullu nalaataqarluni uippakajaaqqajaanartoq taanna oqarpoq:
- Atisanik allanillu errorsinerujussuulluta. Taavalu saniatigut allanik isumagisassaqarluta, suliffinninngaanniit, igaassat, meeqqat uffarnissaat allarpassuillu ilaallu ilanngullugit. Tassa ajoraluartumik kingunerisa ilagaat uippakajaalernera. Oqarluaannaaruma timikkut tarnikkullu peqqinnanngilaq.
Nanortalimmi innuttaasut arlallit kilannik ajornartorsiuteqartut taassuma aamma oqaatigaa. Aallaammi kilattut tarngutaat Nanortalimmi amigaataalersimapput.
- Nakorsaatissaqanngikkallarpugut, tamakkiisumik. Pissutigalugu kilattut amerlasimanermik, maani illoqarfimmi kisimiissimanannginnatta.
Kilak nunatsinni tamarmi ajornartosiutaasoq, Peqqissutsimut Aqutsisoqarfimmiit uppernarsarpaat.
Tassanngaanniilli aamma oqaatigaat, kilaap akiorniarnerani nakorsaatinik pissarsiniarneq ajornartorsiutigigitsik.
