Ilaqutariit Nuummeersut angerlarsimaannaqquneqartut: Coronaviruseqarnerluta misissorneqarusukkaluarpugut
- Ajunngilagut, napparsimanitsinnullu ersiuteqarnani. Kisianni aninissarput, ilaquttat, ikinngutit suleqatillu ilaginissaat silaannarissumiinnissarpullu pisariaqartipparput.
Ungaaq Abelsen Italiap avannaani marsip naanerani sisorariartarfimmiissimasoq oqarpoq. Sisorariartarfik taanna, Passo Tanalememik ateqarpoq, nunallu immikkoortua taanna nappaatip tuniluuffiatut oqartussat oqaatigisaata sanianiippoq.
Ilaqutariit tunillatsissimanerminnut takussutissaqanngikkaluartoq angerlarsimaffimminni mattunnissartik ataasinngormat tikikkamik aalajangerpaat. Taakku meeraat sisamanik ukiulik meeqqaniinngilaq arfineq-marlunnillu ukiulik atuarnani. Ungaaq Abelsen nulialu aamma sulinngillat.
- Angerlaratta tunillatsissimanitsinnut ersiuteqannginnatta suliartorsinnaasugut, (meeqqagullu aaqq.) atuariartorsinnaasut meeqqaniissinnissaasullu ilisimatinneqaraluarpugut. Tamannali toqqissisimanartinngilarput. Meeqqat eqqiluisaarnerpaaneq ajorput, taamaammat tamatta ajunngikkaluarluta ersiuteqanngikkaluarlutalu sillimaniarneq pissutigalugu angerlarsimatiinnarpagut, Ungaaq Abelsen oqarpoq.
Taamaakkaluartorli coronavirusimik tunillatsissimanerlutik misissortikkusukkaluarput.
- Uanga nammineerlunga Italiamiinnikooriaratta qanoq iliuuseqarnissamut iliunnginnissamullu oqartussanit ilitsersuutaasinnaasut amigaatigaakka, Ungaaq Abelsen oqarpoq.
AAMMA ATUARUK Nuummi ilaqutariit nunami coronaviruseqarfiusumeereerlutik angerlarsimaannaqquneqarallartut
Ungaaq ilaqutaalu nunatsinni kisiartaallutik angerlarsimaffimminni mattuteqqanngillaq. Knr.gl-ip Nuummi meeqqerivimmi Timmiaaqqani sulisoq Italiap avannaanut angalasimasoq angerlarsimaffimminit ulluni 14-ini aneqqusaajunnaartoq ippassaq allaaseraa.
Tunillaassortunik nappaalasoqarneranut ataatsimiititaliarsuup innersuussutai:
- innuttaasut nunami aarlerinaatilimmeereerlutik nunatsinnut uternerminniit ulluni 14-ini tulliuttuni angerlarsimaannaqqusaapput.
- innuttaasut nunami aarlerinaatilimmeereerlutik nunatsinnut utersimasut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutinnginnissaat innersuussutaavoq.
Nunat aarlerinaatilittut pineqartut makkuupput:
- Italiami nunap ilai Emilia-Romagna, Lombardiet, Piemonte Venetolu
- Irani tamarmi
- Kina (Hong Kong, Macau Taiwanilu minillugit)
- Korea Kujallermi nunap immikkoortua Gyeongbuk tassanilu illoqarfissuaq Daegu
Tusarfik: Nunatta tunillaassortunik nappaalasoqarneranut ataatsimiititaliarsua, Danmarkimi peqqissutsimut aqutsisoqarfik
Ilaqutariilli coronaviruseqarnersut misissorneqannginneranni malittarisassat malinneqarput. Nakorsaanerummi, Henrik Hansenip oqarnera naapertorlugu nappaammik tunillatsissimanermut ersiuteqanngikkunik misissorneqassanngillat.
Taassuma ilaqutariit Abelsenikkut ernumassuteqarnerat toqqaannartumik akissuteqarfigerusunngilaa, nalinginnaasumillu uku erseqqissaatigalugit:
- Tunillatsissimanermut pasitsaassaqartoqaruni imaluunniit tunillatsissimanermut ersiuteqartoqaruni peqqinnissaqarfik attavigineqassaaq. Kimut sianernissaq nalornissutigineqarpat Nakorsaaneqarfiup nittartagaa iserfigalugu napparsimaviup qaninnerpaap normua nassaarineqarsinnaavoq.
- Nittartakkami nun.gl-imi paasissutissaq amerlinikuupput.
- Tunillaassortunik nappaalasoqarneranut ataatsimiititaliarsuup innuttaasut marsip aappaata kingorna sumiiffinni aarlerinaateqartuniissimasut ulluni 14-ini angerlarsimaannarnissaat inassutigaa.
- Tunillatsissimanermut ersiuteqartut kisimik misissorneqarsinnaapput. Ersiutit tassaasinnaapput: Quersorneq, kissarneqarneq anersaartorniarnikkullu ajornartorsiuteqarneq.
- Tunillatsissimanermut ersiuteqaraanni napparsimmaviit utaqqisarfiinut ingiinnartoqassanngilaq.
- - Sianertoqaqqaassaaq. Napparsimasut napparsimmavimmi napparsimasunut allanut tunillaannginnissaat pissutigalugu aggiinnassanngillat. Taamaammat tunillatsissimasinnaaneq ernumassutigineqarpat takkunnissaq nalunaarutigineqaqqaassaaq, taamaalilluni takkunnissaanut allanut tunillaasinnaajunnaarnissaa pilersaarusiorneqaqqaassaaq, nakorsaaneq, Henrik Hansen oqarpoq.
