Nuummi ilaqutariit nunami coronaviruseqarfiusumeereerlutik angerlarsimaannaqquneqarallartut
Nuummi meeqqerivimmi Timmiaaqqani sulisoq angerlarsimaffimminit ulluni 14-ini tulliuttuni aninngikkallartariaqarallassaaq.
Sulisoq taanna nunami nualluummik coronavirusimik tunillatsinnissamik aarlerinaatilimmeereersorlu taama pisoqarpoq.
Kommuneqarfik Sermersuup attaveqaqatigiinnermut pisortaa, Lars Damkjær taama nalunaaruteqarpoq.
- Kommunip atorfilittaasa ilaat nualluummik COVID19-eqarfiusumeereerluni angerlarsimaffimminit ulluni 14-ini tulliuttuni aneqqusaajunnaarallartinneqartoq uppernarsarpara, Lars Damkjær oqarpoq.
AAMMA ATUARUK Corona: Isolationsrum er klar i Kangerlussuaq og Nuuk
Sulisoq taanna arnaanersoq angutaanersorluunniit qassinillu ukioqarnersoq kommunip ilisimatitsissutigerusunngikkallarpaa, sulisorli taanna parsanganngitsoq erseqqissaatigalugu.
- Sulisoq taanna nappaateqarsinnaaneranik malunnartoqanngilaq, tunillatsissimasinnaaneranillu pasilliuteqarnissatsinnut tunngavissaqanngilagut. Taamaammat sillimaniarluta taama iliorpugut, Lars Damkjær oqarpoq.
- innuttaasut nunami aarlerinaatilimmeereerlutik nunatsinnut uternerminniit ulluni 14-ini tulliuttuni angerlarsimaannaqqusaapput.
- innuttaasut nunami aarlerinaatilimmeereerlutik nunatsinnut utersimasut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutinnginnissaat innersuussutaavoq.
Nunat aarlerinaatilittut pineqartut makkuupput:
- Italiami nunap ilai Emilia-Romagna, Lombardiet, Piemonte Venetolu
- Irani tamarmi
- Kina (Hong Kong, Macau Taiwanilu minillugit)
- Korea Kujallermi nunap immikkoortua Gyeongbuk tassanilu illoqarfissuaq Daegu
Tusarfik: Nunatta tunillaassortunik nappaalasoqarneranut ataatsimiititaliarsua, Danmarkimi peqqissutsimut aqutsisoqarfik
Aqutsisut sulisorlu innersuussutinik malinnissimasut
Sulisoq meeqqerivimmi pisortaminut nunani allani angalareerluni tikikkami nammineerluni nalunaarsimavoq.
Nunanut allanut ministereqarfik taamaalinerani nunanut, sulisup tikissimasaanut angalanissamut inerterinngilaq. Sulisoq taamaammat suliartorpoq.
Nunanulli allanut ministereqarfiup inassutini aqaguinnartoq allanngortippai.
- Saaffiginnereermat tunillaassortunik nappaalasoqarneranut ataatsimiititaliarsuup innersuussutai kingulliit misissoqqissaaratsigit paasivarput, sulisoq taanna angerlarsimaffimminit aneqqusaajunnaarallassasoq, Lars Damkjær oqarpoq.
Sulisoq taamaammat sapaatit akunnerini marlunni angerlarsimaannarallaqquneqarpoq.
AAMMA ATUARUK Corona: Isolationsrum er klar i Kangerlussuaq og Nuuk
Tunillaassortunik nappaalasoqarneranut ataatsimiititaliarsuarmi siulittaasup, Svend Foldagerip sulisoq taanna ataatsimiititaliarsuup innersuussutaanik malinnissimaneranik nersualaarpaa.
- Taanna innuttaasutsialaavoq, Lars Damkjær oqarpoq.
Nunatsinni nakorsaanerup Henrik L. Hansenip pisoq ilisimasaqarfiginngilaa, ilisimatitsissutigaali coronavirusimik tunillatsissimasorinnittoqanngippat tunillatsittoqarsimanngippalluunniit peqqissutsimut pisortaqarfik akuliunnavianngitsoq.
Nualluutip COVID19-ip nunatsinnut annguterataannaanissaa aarlerinaateqarpianngittuarsinnartoq navianaallu taanna allannguuteqanngitsoq, tunillaassortunik nappaalasoqarneranut ataatsimiititaliarsuarmi siulittaasup Svend Foldagerip ilisimatitsissutigaa.
Allaaserisaq nal. 14.20 nutarterparput, sulisoq angerlarsimaannarallartussanngunnginnermini ullormi ataatsimi sulisomasoq ilassutigalugu.
