Coronavirus: Kangerlussuarmi Nuummilu ineeqqanik piareersimatitaqarput

Nualluutip coronavirusip nunatsinnut anngunnissaa ilimanarsigaluttuinnartoq, nunatta nakorsaaneqarfiani nakorsaq ilimasaarivoq.
Nualluummut coronavirusimut tunillatsissimasorisoq uani ineeqqami Nuummi Dronning Ingridip Napparsimmavissuani misissortissaaq. Assi © : KNR
Allattoq Marie Kûitse Kristensen, Aviâja Kilime
marsip 05-at 2020 07:26

Danmarkimi inuit ikinnerpaamik 15-it maannamut coronavirusimik tunillatsissimasut nalunaarsorneqarput. Savalimmiunilu ataaseq, nunatsinnut suli anngutinngitsoq nakorsaq ilisimatitsivoq.

Kisianni anngutissagaluarpat Nuummi Kangerlussuarmilu ininik immikkut inissiivigineqarsinnaasunik pilersitsisoqareerpoq.

Nualluut nunatsinnut anngutissappat, nualluttoq Nuummi Kangerlussuarmilu ineeqqani kisimiititaaffissaqarpoq.

- Iseqquneqassaaq tassunga inimut, tassanilu inimi apersorneqassaaq taavalu misissorneqarluni, taavalu tigusiffigineqarluni toqqusaamininngaanniit immaqaluunniit puaata aqqutaaninngaanniit.

Nunatsinni nakorsaaneqarfimmi nakorsaq, Paneeraq Noahsen, taama oqarpoq. 

Tunillaassuineq imatut pinaveersaartissinnaavat:

 

  • Assaat qaqorsaaserluarlugit asalluartarlugit
  • Assaat tunillannartuiaammik tanittarlugit
  • Quersornermi kakkissarfiit ataasiartakkat quersorfigeriarlugit igittarlugit
  • Quersornermi qaneq talimik asserlugu
  • Tangajornermi qaneq talimik asserlugu
  • Qinngat isillu passunnaveersaarlugit
Assi © : KNR

Misissortinneq tunillatsissimasutut ersiuteqarpat,  pineqartoq angerlartinneqassaaq aneqqusaajunnaarallarluni. Utoqqaagaannilu peruluttuulluni ikiorneqarnissamillu pisariaqartitsisuulluni taava napparsimmavimmi ineeqqami matoqqasumiitinneqarnissaq periarfissaassaaq.

Nuallussorisamillu misissugassaq Danmarkimut nassiunneqassaaq. Taava sila atortorissaarutillu apeqqutaallutik Danmarkimut qaqugu apuunnissaa apeqqutaasinnaavoq:

- Kisianni Danmarkimut tikereeriaruni tiimit arlalinnguit ingerlaneranni akissut pineqassaaq.

Nunatsinnullu isaaviit allat, soorlu Kulusuk, toqqaannartumik Islandimiit Islandimullu timmisartuussisoqartarpoq. Tassani aamma coronavirusertoqalissagaluarpat qanoq sulinissaminnik Peqqinnissaqarfimmi piareersaleruttorput.

- Peqqinnissaqarfiit tamarmik nuna tamakkerlugu piareersarput inimik misissuiffigisinnaasumik piareersarput. Maannakkut? Ija, piareeriinngikkunik.

Coronavirsusi 'takkutissagaluarpat'-mik 'takkuppat'-milluunniit oqassanerluta?

- Ilimanarsiartuinnarpoq coronavirusi takkunnissaa, ingammik Europami tunillaassuinerit amerliartortillugit.

Aamma atuaruk