Ilaqutariit arsalerituut AWG-riaqqilerput

Marlulissat Nick aamma Lars Erik Reimer Nagdlúnguameersut Arctic Winter Games-imi arsaateqataasussatut toqqagaapput. Taamaasillutik qatanngutigiit tallimat Arctic Winter Games-eqartarnerani peqataasussanngorput.

Ilaqutariit taakku arlaleriarlutik nunanut allanut unammisartunut peqataasortaqartarput. Ataataasoq Jakob Reimer 1983-mi 1986-milu nunanut allanut unammisartunut peqataavoq. Ukiullu 14-it qaangiuttut kinguaariit tullii peqataapput. Tassa 2000-mi Whitehorse-imi unammersuartoqarmat qatanngutiit angajullersaat Ivalu Reimer Arctic Winter Games-eqataavoq. Tamatuma kingorna nukai Aviana aamma Manumina Reimer Arctic Winter Games-ertoqarnerani unammisartutut toqqagaasarput.

Aviana aamma Manumina Reimer aasaq kingulleq Island Games-imi nunarput sinnerlugu unammeqataapput arnat arsaattartut bronze-nnammata. Angajuat Ivalu Reimer aamma 2007-mi Island Games-imut peqataavoq, taamanikkut arnat arsaattartut Island Games-imut peqataarngaarmata.

Maannalu tassa marlulissat Nick aamma Lars Erik Reimer peqataassamaalerput Whitehorse-mi Arctic Winter Games-eqarnissaanni nunarput sinnerlugu unammeqataasussanngoramik.

- Ilimagisimanngikkaluarpara marlulissat Arctic Winter Games-imut toqqagaanissaat, ataataasoq Jakob Reimer Nagdlúnguup inuusuttuarartaani marlulissat arsaqataaffigisagaanni sungiusaasuusoq oqarpoq.

Arsaattartut kattuffiat Arctic Winter Games-imut piukkunnartunik innersuusseqqusimmat innersuussisimanngilaq, angajoqqaatut inissisimanini pissutigalugu innersuussaqarnissani pissusissamisoorsorinnginnamiuk.

- Kisianni taava allat innersuussisimagunarput marlulissat piukkullugit. Taamaammat toqqagaanerat assut tupaallaatigaara, ataataq tulluusimaaqisoq unnersiorpoq.

Arctic Winter Games-mi arsaattut unammersuarnerat marsip tallimaat aallartissaaq marsip sisamaani ammaanersiortoqareerpat.