Ilaqutariit Air Greenlandip corona pillugu ilungersorneranut: Toqqissisimananngilaq
Corona misissuisarfinnut napparsimmavimmullu siuleriiaattorpassuaqartitsillunilu unammillernartoqartitsiinnanngilaq.
Coronami Air Greenlandimut aamma unammillernartoqartitsivoq. Sulisummi ilaasullu akornanni tuniluunneq pissutigalugu timmisartuuteqatigiiffiup timmisartuussiniarneranut ajornakusoortitsivoq. Taamaattumik piffissami aggersumi silaannakkut angallassinissanik allanngortitsinerit aammalu taamaatitsinerit kingusissukkut pisarsinnaapput, tamatumalu saniatigut www.airgreenland.gl aqqutigalugu januaarip ulluisa 16-iat ilanngullugu angalanissamik inniminniisoqarsinnaanani.
Nunatta iluani timmisartuussinerit saqisoqaratik angalaratarsinnaapput, matumanilu timmisartumut ilaasut amerlanerpaamik 19-iunissaat piumasaqaataavoq.
Timmisartumi pilotit isumannaallisaanermut tunngasunik iliaimatitissuteqarlutillu ilaasunut attaveqartuussapput.
Tamannalu aappariit Akannguaq aamma Louise Jeremiassenip tusarlugu nuannarinngilaat.
- Toqqissisimananngilaq pilotit aquttuupput taava aquttarfik qimallugu stewardisit suliassaannik suliaqartassappata ilaasuulluni toqqissisimanarunnanngilaq, Louise Jeremiassen oqarpoq.
Aallannginnermi akissutersinngitsut
Taakku sisamanik meeraqarput Aasiannilu najugaqarlutik. Ilaqutariit decembarip ulluisa 27-anni Nuummut ukiortaarsiariartorput, januaarillu sisamaani Aasiannut uteqqittussaagaluarlutik. Aallanngitsoorpulli.
- Testertikkatta 48 tiimit kiisa qaangiupput suli tusagaqarnata, aamma massakkut allatut ajornartumik testertikkiartoqqippugut, Akannguaq Jeremiassen oqarpoq.
- Qasunarpoq nammineq Aasianni angerlarsimaffeqareerluni aamma meeqqagut qasukkunnarsipput namminerisatsinnimmi angerlarsimaffeqarpugut, Louise Jeremiassen oqarpoq.
Angallassinissamullu pileraarutini kingusissukkut taamaatitsinernik allannguutinillu takkuttoqartarsinnaanissaa ilaqutariit aamma qasuummissutigaat.
AAMMA ATUARUK Covid-19-ip tuniluunnera timmisartuussinernut akornutaasoq
- Uagutsinnut eqqarsarnartupilussuuvoq maanimi mattussaassagutta suliffiga nuliamalu ilinniarnera eqqugaarujussuarsinnaagatta, Akannguaq Jeremiassen oqarpoq.
Louise Jeremiassenilli suna tamarmi inissikkumaartoq neriuutigaa, kisianni:
- Kipiluttunassaqaaq angalaniarluni immaqa ilia angerlarnissaminnut suli bilitsisinngeruttortut, Louise Jeremiassen oqarpoq.
Naammagittassaagut
Anja Weiss mittarfimmiilluni utaqqivoq. Taanna pingasunngornermi aallartussaagaluarpoq, angalanissaali tallimanngornermut kinguartinneqarpoq:
Assi: Karline Platou
- Uuminalaartarpoq uaguttaaq pingasunngormalli aallartussaagaluarpugut kisianni pissutsit taamaatsillugit naammagittartariaqarpugut coronami aqussinnaanngilarput, Anja Weiss oqarpoq.
Taassuma saqisoqartinnagu timmisartukkut angalanissaq aamma ernumassutiginngilaa.
- Misigisassaassoormiaasiit, pingaarnertut isumannaallissaanissaq eqqumaffigineqarpasippoq tassa pilotiniit paasissutissat tunniunneqartalissasut, uanga ajoriffissaqartinngilara, misigisassatut paasiinnarpara, Anja Weiss KNR-mut oqarpoq.
