Covid-19-ip tuniluunnera timmisartuussinernut akornutaasoq

Piffissami aggersumi silaannakkut angallassinissanik allanngortitsinerit kingusissukkut pisinnaapput aammalu taamaatitsinerit pisarsinnaasut Air Greenland tusagassiuutinut nalunaarummini taama allappoq. 

Air Greenlandimimi sulisut ilaasussallu akornanni tuniluunneq angerlarsimaqqusaanerlu atuummata sulisut sullissinerlu aamma eqqugaapput.

-Silaannakkut angallassinissanut pilersaarutit malillugit sapinngisarput tamaat ingerlatsiniartuarpugut, ilaasussallu tunillanneqarnerup nassataanik aallarsinnaajunnaartut angalanissaat allanngortittarlugillu pivugut, Covid-19-ili piffissami matumani nunatsinni Danmarkimilu annertuumik atuuppoq, ilaatigut piffissaq kingulleq atorlugu allanngortitsisariaqartarsinnaasarluta, Air Greenlandip atuisunut sullissinermik pisortaa Johanne L. Knudsen oqarpoq.

Attaveqarfissat eqqortut tunniunneqarnissaat pingaartoq

Taamaattumik Air Greenlandip pisariaqartippaa, ilaasussanut attaveqarfissat eqqortut iluamik Air Greenlandimut paasissutigineqartarnissaat.

-Arlaatigut angalanissamut tunngasunik sms-ikkut mailikkulluunniit tassanngaannaq ilisimatitsissagutta ilaasunut paasissutissat eqqortut piginissaat pingaaruteqarluinnarpoq. Aamma Club Timmisa app-i atorlugu angalanissat nalunaarsorukku iluassaqaaq, tassuunami allannguutit malinnaaffigiuarsinnaavatit, taakku oqarput.

Timmisartullu iluani ilaasinnaasut aamma killeqarput, ilaasinnaasummi taamaallaat 19-iusinnaapput.

Kalaallit Nunaanni silaannakkut angallassineq qulakkeerniarlugu Air Greenland Angallannermut aqutsisoqarfimmit timmisartuni DASH8-ni saqisoqarnani timmisartuussinissamut immikkut ittumik akuerineqarpoq. Akuersissumilu matumani piumasaqaataavoq timmisartuussineq ataaseq amerlanerpaamik 19-nik ilaasoqarsinnaassasoq, Air Greenland allappoq.

- Timmisartuussinernilu taakkunani timmisartumi pilotit isumannaallisaanermut tunngasut ilisimatitsissutigalugillu ilaasunut attaveqartuussapput.

- Ilaasussallu timmisartup 19-iinnarnik ilaasoqarsinnaaneranik eqqugaasut, tassa ulikkaarussaasut piaarnerpaamik timmisartuussinissamut allamut nuunneqartassapput, taakku allapput.

Ilaasinnaasut killeqartut

Pissutsit maannakkut atuuttut peqqutaallutik sapaatip akunnerani aggersumi nunap iluani timmisartuussinermi inissat aamma ikittuinnanngorput.

- Oqartussallu innersuussutaat malikkatsigit, maannakkumiit jannuaarip 16-iata tungaanut www.airgreenland.gl-ikkut bilitsisisoqarsinnaanngilaq, Air Greenland paasissutissiivoq.

- Timmisartuussivissanili assigiinngitsuni inissat ikittunnguit ammatinneqarput, innuttaasunut pisariaqavissumik angalasussanut atorneqartussat, soorlu napparsimaleriataarneq, qanigisamik toqusoqarnera assigisaaluunniit peqqutigalugit angalasariaqalersunut.

Tassunga tunngasumik Air Greenland saaffigisariaqassagukku, uunga allassaatit websupport@airgreenland.gl