Ilaqutaariit ajornartorsiortut aqqutissiuunneqassasut

Isumaginninnermut Aqutsisoqarfiup atuagaq "Ilaqutariinni aqqutissioqatigiinneq"-mik qulequtserlugu saqqummersippaa.

Atuagaq inunnik isumaginninnermik suliaqartunut ilitsersuutaavoq periusissianik imaqartoq. Meeraq inuusuttorluunniit ajornartorsiuteqaraangat atuagaq "Ilaqutariinni aqqutissioqatigiinneq" atorlugu ilaqutariit aqqutissiuunneqartassapput.

Qitiusumik Siunnersuisarfik KNR-imut taama paasissutissiivoq.

Ilaqutariit ajornartorsiortut inuunerat pitsaanerulersinniarneqartoq

Ilaqutariit tamarmik nukissaqarnerat periutsimi aallaaviuvoq, aamma ilaqutariit inuuniarnikkut ajornartorsiutillit.

Meeqqat angerlarsimaffiup avataanut inissinneqartut ikilinissaat siunertaralugu atuagaq saqqummersinneqarpoq: 

- Ilaqutariinni aqqutissioqatigiinnermi ilaqutariit qanigisatik, ikinngutitik imaluunniit meeqqap inuunerani inuit pingaarutillit allat naapittarpaat. Peqataasut tamarmik meeqqap ilaqutariillu inuunerisa qanoq pitsaanerulersinnaanerat pillugu oqalliseqataasarput, Qitiusumik Siunnersuisarfik allappoq.

AAMMA ATUARUK Atornerlunneqarsimasut tappiffigineruniarpaat

Atuagaq, Isumaginninnermut Aqutsisoqarfimmit immikkut siunnersortimit siunnersortimillu allamit suliarineqartoq, kommuninut ulluni makkunani nassiussuunneqaleruttorpoq.

Isumaginninnermut Aqutsisoqarfik ilaqutariinni aqqutissioqatigiinneq pillugu periutsinik Sisimiuni, Maniitsumi, Ilulissani, Tasiilami, Qaqortumi, Narsami, Nanortalimmi, Upernavimmi, Kullorsuarmi, Qaanaami, Uummannami, Kangaatsiami, Nuummi Qasigiannguanilu pikkorissaareerpoq, Aasiannilu maanna pikkorissaaleruttorluni.

Isumaginninnerup iluani sulinermi attuumassuteqartut katillugit 266-it pikkorissarneqarput.

Atuagaq Qitiusumik Siunnersuisarfiup nittartagaani aaneqarsinnaavoq.