Ilagiit Kalaallit namminersulivissanersut biskoppip paaserusuppaa
Namminersornerup atuutilernerata kingunerisaanik Kalaallit Nunaanni ilageeqarneq pillugu peqqussut atorunnaarpoq, inatsimmillu taarserneqartussanngorluni.
- Ilagiit kalaallit naalagaaffeqatigiinnerup iluaniittutut inissisimajuarnissarput taanna eqqarsaataasoq paasivara, kisianni tamanna politikerit aalajangissavaat, kisianni neriuutigeqaara
massakkutut inissisimajuassasugut, Biskop Sofie Petersen oqarpoq.
Danmarkimi ilagiinni kalaallit ilagiit immikkut 1993-imi biskopeqalerput, inatsisitaarnissamullu atatillugu ilagiit kalaallit naalagaaffeqatigiit ilagiivinut atajuarnissaat Biskop Sofie Petersenip kissaatigaa iluaqutissartaqarsoralugulu.
- Naalagaaffeqatigiinnermi ilagiinnut ilaatilluta silarsuarmi siunnersuisoqatigiiffinnut ilaavugut, lutherikkormiut kattuffiannut ilaavugut, silarsuarmilu suliniaqatigiiffinnut assigiinngitsunut peqataalluta. Ilagiit akornanni suleqatigiiffiit aamma ilaasortaaffigaagut, Biskop Sofie Petersen oqarpoq.
Savalimmiuni ilagiit naalagaaffeqatigiit ilagiivinit 2007-mi avissaarput. Savalimmiunilu ilagiit namminersulivinnerat eqqarsaatigilluangaanngitsoq, Biskop Sofie Petersen isumaqarpoq.
- Savalimmiormiut paasivaat suliniaqatigiiffimmit ikiorneqarsinnaanatik. Soorlu immaqa eqqarsaatigilluagaanngitsumik avissaarsimapput. kittorarpaat qilerutit assigiinngitsut, Sofie Petersen oqarpoq assersuutigalugulu nassuerutitsinni imaluunniit ajoqersuinikkut arlaannik eqqunngitsuliortoqassappat Danmarkimi nukiit pioreersut atorsinnaagatsigit Savalimmiormiullu tassuuna massakkut ikiorneqarsinnaanngitsut.
