Ikummatissap akia apparpoq
Nunarsuarmi ikummatissap akiata appariartornera tamatumunnga pissutaanngilaq, amerikami dollarsip nalingata apparnera pissutaavoq. Ikummatissarsinermi akiliutaasup amerikamiut dollariata nalinga ukiormanna aggustimi ikummatissap akinganik qaffaanermi tunngavigineqartoq ilimagisamit maannamut appasinnerusimasoq Polaroilip tusagassiuutinut nalunaarummini allappaa.
Qanorluunniit tunngaveqaraluarpat, Polaroilip nunatsinni innuttaasunut juullimi tunissutissaqalerpoq, Gasoliap, Petroleup Benzinallu akii aqagumiit decembarip aallaqqaataani 24 øremik appartinneqarneratigut.
Tamatuma saniatigut ingerlatsinermi sulisoqarnermilu aningaasartuutit ataatsimut isigalugu sipaarfiusimapput, kiisalu atortuutinik attartortitsinermi naatsorsuutigissaminnit isertitaqarnerusimanertik pillugu ikummatissap akianut appaanisamut periarfissaqalersimallutik suliffeqarfiup oqaatigaa.
Aqagu appartinneqassapput
Aqagumiit Gasolie/diesel literimut 6,65 kr.-imiit 6,41 kr.-imut, Petroleummi literimut 6,76 kr.-imiit 6,52 kr.-imut Benzinalu literimut 6,50 kr.-imiit 6,26 kr.-imut appartinneqassapput. Tamarmillu avatangiisinut akitsuut literimut 10 øreusoq ilanngutereerlugu.
Nunarsuarmi akiusut appariartornerat nunatsinnut suli sunniuteqanngilaq, 2014-mi aalajangersimasumik akiliinissamik KNI A/S Polaroil isumaqatigiissuteqareermat.
Taamaaliorneq 2008-miit 2013-mut inuiaqatigiinnut 197 million koruuninik sipaarutaasimavoq.
Appaqqinnissaa neriorsuutigisinnaanngilaa
Ukiormannalu nunarsuarmi ikummatissap akiata apparnera nunatsinnut suli iluaqutaasimanngilaq, appaasoqarnissaa sioqqullugu ukiormannamut aalajangersimasumik akiliinissaq isumaqatigiissutaareersimammat.
Ukiormanna ikummatissaq kingulliugallartoq Polaroilip tikisereerpaa. Apriilimilu 2015-mi nunatsinnut ikummatissamik assartuisoqaqqilissaaq, taamaakkaluartoq, 2015-mi akimik appaasoqaqqinnissaa polaroilimit neriorsuutigineqarsinnaanngilaq.
- Pisussat arlallit apeqqutaapput, maannamut suli qanoq inerneqarumaarneri ilisimanngilagut, KNI A/S-imi pisortaaneq Peter Grønvold Samuelsen KNR-mut ullumi taama oqarpoq.
