Ikuallattoqarneranik kalerriiniarneq erloqinartoq
Politiit pissusilersorsimanerat pillugu politiit pisortaat ima nassuiaavoq:
- Pisimasoq ajuusaarnarpoq, ikuallattoqarnersorli ikuallattoqannginnersorluunniit siarngutigineqarnerani iluamik oqaatigineqanngitsoq isumaqarpugut, Nuummi politiini politikommissæri Niels Nyvang oqarpoq, nangillunilu:
- Innaallagissamut sakkortusaavimmiit pujuliortoqarnera, Kirstine Godtfredsenip sianernermini ersarinnerusumik oqaatigisimasussaagaluarpaa, Nyvang oqarpoq, politeeqarfiup avataaniit sianertunut tigooraavianit saaffiginnittunut inussiarniilliortoqarsimannginnerarlugu.
Kirstine Godtfredsen ilaquttanilu sakkortusaaveqarfiup qulinnguani najugaqarput, ikuallassunnittoqartarsimaneralu qangali naamasarsimanerarlugu.
- Ajornartoortoqartoq paasigutsigu, taava sulisugut nalunavianngilaat. Ajornartoortoqarnerali innuttaasup matumani iluamik ilisimatitsissutigisimanngikkaa isumaqarpunga, Niels Nyvang oqarpoq, politiit normunik paasiniaaviunnginnerat erseqqissarlugu:
- Normunik paasiniaaviunngilagut. Assingusunik sianertoqartuaannarpoq, apeqqutillu imaaginnavittarlutik, Nuummi politikommissæri Niels Nyvang oqarpoq.
Nuummi Blok 1-imi innaallagissamut sakkortusaavimmi ataasinngormat ikuallattoqarmat, Nuup ilarujussua innaallagiaarukkaluarpoq.
Innaallagissap aqqutaata peqqutaasimassangatinneqarpoq.
Pisiniarfeqarfissuup Nuuk Bycenterip snaneqarnera innaallagiartornartorujussuuvoq, sakkortusaavimmillu tapertaasussamik pisariaqartitsisoqarluni:
- Innaallagissamut sakkortusaavimmik ikkussineq innaallagissap aqqutaani attuuttoornikkut sarfaarutsitsisimasinnaavoq. Apeqqutaavorlu tamanna qangalili pisimasinnaassanersoq, imaassinnaavormi sivisuumik taamaaleqqajaasimasoq, Nuummi Nukissiorfiit oqarput.
Blok 1-imi innaallagissamut sakkortusaaviup qulinnguani najugalik Kirstine Godtfredsen oqarpoq politiinut sianernermini qatserisartut normuat apeqqutigisimallugu. Uippakajaarsimanerarpoq, ikuallattoqarnerali siarngutigisimanerarlugu.
