Ikuallattoqarnerani Ilulissani ajunaartoqarpoq

Ilulissani Atersuarni najugaqartut angerlarsimaffitik tallimanngornermi unnukkut qimattariaqalerpaat ikuallattoqarnera pissutigalugu. Angut 46-nik ukiulik ikualannermi ajunaarpoq inuillu arlallit qatserisartunik ilaqartut, napparsimmavimmi misissorneqartariaqarsimapput putsumik najuussuisimanertik pissutigalugu.
Allattoq Noah Mølgaard
septembarip 15-at 2012 11:48

Inissiaqarfik annertooq ikuallannermi eqqugaavoq. Ineqartut aqqaneq marluk maanna akunnittarfimmut inissinneqarput.

- Ikuallannermut suna pissutaasoq suli naluarput. Ikuallanneq inissiami sorlermi aallartissimassanersoq pasitsaapparput oqareernittulli sunarpiaq aallarniutaasimanersoq suli paasiniarparput, Qaasuitsumi politiit pisortaat Poul Petersen KNR-imut oqarpoq.

Inissiat ikuallaffiusut inuttaat tamarmik qimagutsinneqarput inuillu aniatinneranni inuk toqungasoq siumorneqarpoq. Angut 46-nik ukiulik napparsimmavimmut apuunneqarami toqoreersimasutut nalunaarutigineqarpoq.

Ikuallanerup nalaani inissiat iluanni kissartorujussuanngorsimavoq annertuumillu pujuliortoqarluni. Qatserinerup nalaani qatserisartut pingasut napparsimmaviliaanneqartariaqarsimapput putsumik najuussuisimanertik pissutigalugu. Inuit allat sisamat aamma napparsimmaviliaanneqarput putsumik najuussuisimanertik pissutigalugu misissorneqarlutik.

- Qatserisartut inuillu allat misissorneqartut tamarmik ajunngillat, Poul Petersen oqarpoq.

Politiit qatserisartullu ikuallaffik suli misissuiffigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq