Ikuallannerup kingorna: Ilulissani imeqarfik mingutsinneqarsimanngilaq
Ilulissani imeqarfimmit imernissap ernummatigineqarnissaa pisariaqanngilaq.
mingutsinneqarsimanersoq paasiniarlugu misissugassamik tigusiffigineqarnera kingulleq akissutisineqarpoq. Erngup mingutsinneqarsimaneranik takussutissaqanngitsoq Ilisimatusarnermut Avatangiisinullu Naalakkersuisoqarfik tusagassiutinut nalunaarummi allapput.
Ilulissani eqqaavissuaq maajip qaammataani sapaatit akunnerini pingasuni ikuallanneranit imeqarfik mingutsinneqarsimanissaa oqartussanit aarleqqutigineqarpoq. Taamaammat imeqarfimmit misissugassanik arlalinnik tigusisoqarpoq.
AAMMA ATUARUK Ilulissani imeq eqqaavissuup ikuallanneranit mingutsinneqarsimanngitsoq misissuinerit takutippaat
Ilulissani erngup mingutsinneqarsimanissaa innuttaassunit ernummatigineqartariaqanngitsoq Ilisimatusarnermut Avatangiisinullu Naalakkersuisoqarfimmi pisortap Mette Skarregaard Pedersen oqarpoq.
- Erngup imernissaa innuttaasut ernummatigisariaqanngilaat, Ilisimatusarnermut Avatangiisinullu Naalakkersuisoqarfimmi pisortaq Mette Skarregaard Pedersen allakkatigut KNR-imut taama paasissutissiivoq.
Imeq dioxineqartoq
Misissukkat kingulliit juunip aqqarngani akissutisineqarput, imeq dioxinimik kloritalimmik toqunartoqartoq paasineqarpoq. Dioxinilli annikitsuaraannaat nassaarineqarmata peqqissutsimut ajoqusiisussatut nalilerneqanngitsut, taamaattumillu imeq nalinginnaasumik atorneqaannarsinnaasoq nakorsaaneq immikkut ilisimasalinnik nunanit allaneersunik misissueqateqareerluni naliliivoq.
Ilulissani imeq literi dioxinimik 3,64 picogramimik aammalu 3,55 picogramimik akoqartoq, erngup misissornerani erserpoq, taamaammat imeq Mette Skarregaard Pedersenip oqarnera naapertorlugu dioxinimik akoqangaanngilaq.
USA-mi erngup literip dioxineqarneranik uuttuut 30 picogram killiliussaasoq, naalakkersuisoqarfiup pisortaata ilisimatitsissutigaa.
- Dioxini imermiittooq annikittuaraannaammat peqqissutsimut ulorianaateqanngitsoq nakorsaanerup inerniliutigaa, Mette Skarregaard Pedersen allappoq.
Akuutissaq dioxini inunnit pinngortinneqartuni "toqunartoqarnerpaanut" ilaasoq danskit avatangiisinut aqutsisoqarfiata nittartagaani atuarneqarsinnaavoq. Akuutissaq kræfteqalissutaasinnaasuuvoq timip pissusaanik allanngortitsisinnaalluni.
AAMMA ATUARUK Eqqaavissuarmi ikuallattoqarnera: Adamip mingutsitsineq arleqqutigalugu imermik pisiniartarpoq
Ilulissanilu imeqarfik ataavartumik misissuiffigineqassasoq Mete Skarregaard Pedersenip ilanngullugu paasissutisiissutigaa.