Ilulissani imeq eqqaavissuup ikuallanneranit mingutsinneqarsimanngitsoq misissuinerit takutippaat

Nukissiorfiit Namminersorlutik Oqartussaniillu Avantangiisinut Naalakkersuisoqarfik suleqatigiillutik Ilulissani imermut tunngatillugu pissutsit qanimut malinnaaffigaat.

Misissuinernit kingullernit akissutissat maanna pissarsiarineqarput.

- Ilulissani eqqaavissuarmi ikuallattoqarnerani imermut mingutsitsisimanngitsoq erngup misissuiffiginerata takutippaa, Avatangiisinut naalakkersuisoqarfiup pisortaa, Mette Skarregaard Pedersen allappoq.

Misissuinermi ikumanermit sinnikunik susunneqartunik, assersuutigalugu ikuallattoqarneranit putsumit pilersinneqartartunik, erngup annertuallaartumik akoqarsinnaanera misissorneqarpoq.

AAMMA ATUARUK Eqqaavissuarmi ikuallattoqarnera: Adamip mingutsitsineq arleqqutigalugu imermik pisiniartarpoq

Nukissiorfiit Avatangiisinut Naalakkersuisoqarfillu erngup dioxinimik akoqarsinnaanera aamma misissuiffigaat. Dioxin akuutissaavoq toqunartortalik taanna eqqagassanik ikuallaanermi pilersinneqartarpoq.

Naalakkersuisoqarfiulli misissuinerit taakku akissutersinissaat suli utaqqivaa.

- Pissutsit qanimut malinnaaffigivagut, Ilulissanilu piffissami aggersumi imermit misissugassamik aamma tigusisoqaqqikkumaarluni, Mette Skarregaard Pedersen KNR-imut mailikkut allappoq.

KNR-ip innuttaasut ilaat illoqarfimmi erngup mingutsinneqarsimasinnaanera pissutigalugu kuuffimmit imerusunngitsut sapaatip-akunnerani kingullermi oqaloqatigai.

Eqqaavissuaq ulluni 21-ni ikuallappoq, qatserisartullu ulloq unnuarlu qamitsiniaasimallutik.

Avannaata Kommuniani upalungaarsimasut pisortaata, Jens Dahl ikuallattoq maanna qaminneqarsimasoq pingasunngornermi ualikkut paasissutissiissutigaa.

Ilulissani qatserisartut pisumi immikkut ittumi ikiorniarlugit Uummannamit Qasiannguaniillu qatserisartut ikiuukkiartornikuupput.

Tassa Uummannamit qatserisartut tallimat Qasiannguaniillu tallimat ikiuukkiartornikuullutik.