Ikuallannerit annertuut qamittut
Kangerlussuup Sisimiullu akornanni nuna ikumammat pisuttunit ingerlaarfigineqaqqusaannginnera maanna atorunnaarpoq. Qeqqata Kommuniani upalugaarsimanermut pisortaq KNR-imut taama oqarpoq.
- Ippassaq unnuarlu siallerpoq, taamaalilluni nunap annertuup ikumanera qaminneqarluni, tamanna isumaqarpoq pisuttunut aqqut Arctic Circle Trail atorneqarsinnaaqqilertoq, Ole Kreutzmann oqarpoq.
AAMMA ATUARUK Sialuit qulimiguullillu nunamik ikuallattumik qamisaataaqataapput
Nunami ikuallannerit amerlasuut qaminneqaraluartut qaqqap qaavini tikikkuminaatsuniittut sumiiffiit marluk suli ikumasut annikitsunillu pujuliortut taassuma oqaatigaa.
- Ullumikkut ullup ilaani unnugulu siallernissaa naatsorsuutigaarput. Taamaammat qaqqap qaaviniittut aqagu alakkassallutigit naatsorsuutigaarput, taakkua pisuttunut ulorianartorsiortitsinngillat, Ole Kreutzmann oqarpoq.
AAMMA ATUARUK Putsuaarimmi takornariat ingerlariaqqinneq ajulersut
Ikuallanneq juulip arfineq pingajuanni aallartippoq. Nuna ikumasoq kvadrat kilometerinik sisamanik annertussusilik qatserisartut Air Greenlandillu qulimiguuliutaata sialummit iluaquteqarlutik qatserpaat.
