Putsuaarimmi takornariat ingerlariaqqinneq ajulersut

Amerikkamiut takornariat marluk Sisimiut Kangerlussuullu akornanni pisuttut sisamanngormat unnukkut qulimiguulimmit annaanneqartariaqarput.

Nuummi politiit pigaartuini pisortaq Mads Lynge Christiansen taama oqaluttuarpoq.

- Ippassaq unnukkut nalunaaqutaq 22 ajornartoornermi nassiussisartoq nassiussisimasoq nalunaarfigineqarpugut. Sunaaffa amerikkamiunit takornarianit marlunneersoq. Putsumut immaqa pinngortitap ikuallanneraneersumut pulasimasut, oqaluttuarpoq.  

- Putsup iluani sumiissusersisinnaajunnaaramik aaneqarnissaminnut pisariaqartitsisimapput.  

AAMMA ATUARUK Politiit ikuallattoqallattaarmat mianersoqqusipput: Pinngortitami ikumatitsinissaq mianersuussiuk

Taamaattumik qulimiguulik annaassiniartaat aallartinneqarpoq taakkulu marluk taassuminnga Kangerlussualiaanneqarlutik.

Politiit naapertorlugit ikuallanneq Kangerlussuarmit 15 millit missanni ungasitsigisumi pivoq – kilomerinngorlugit 24 kilometerit missaanni.

Pinngortitaq panerpoq

Massakkorpiaq pinngortitaq paneqaaq, Sisimiullu eqqaanni ikuallanneq annertooq sapaatip akunnera manna qaminneqarpoq.

- Panertorujussuuvoq. Upernajaarpugut, apullug aajaarpoq. Taamaattumik suna tamarmi paneqaaq, Sisimiuni politikommissær Karl Jørgen Lennerth sapaatip akunnerata ingerlanerani siusinnerusukkut KNRimut taama oqarpoq.

Aamma Nuumi ikuallannerit minnerit ajornartorsiutigineqarput. Taakku aallartittarput sikaritsikut igitat imaluunniit igalaamerngit aseqqukkut seqinermit kissallutik ivikkanik naasunillu ikuaallatsitsisarmata.