Inissiisarfinni paarsisunngortussat siunissaat artornassasoq
Inissiisarfimmi paarsisutut Nuummi ilinniarlutik ukiaq aallartittut 23-upput. Ukiamullu ilinniarlutik aallartittussat allat katillugit 25-iussapput, ilinniartussallu affaat maanna nalunaareersimapput, Nunatsinni Pinerluuteqarsimasunik Isumaginnittoqarfik taama ilisimatitsivoq.
AAMMA ATUARUK Parnaarussivinni sulisut kattuffiat akissarsiat nikingassutaannik aaqqeeqqusisoq
Tamannalu Danmarkimi Parnaarussivinni sulisut kattuffiata, inissiisarfinni paarsisut ilaasortaaffigisaata, nuannaarutigaa. Aammali ernumasoqarpoq.
- Maanna atorfeqartut suliunnaartut taarsernissaannut naammaqqarput. Aamma Nuummi inissiisarfittaassaq pissutigalugu inissiisarfinni paarsisut marloriaataannik ukioq ataaseq qaangiuppat pisariaqartitsilissaagut, Parnaarussivinni sulisut kattuffianni allatsi, René Larsen, KNR-imut taama oqarpoq.
Kattuffik: Aaqqiigallarneriinnaavoq
Nuummi inissiisarfimmi paarsisutut atorfiit qulit ullumikkut inuttaqanngillat. Atorfiillu taakku - Nuummi inissiisarfittaassap atulernerata kingorna atorfiit ilassutaasut 24-t ilanngukkaanni - inissiisarfimmi paarsisutut ilinniarsimasunit nutaanit naammaqqartumik inuttalerneqarsinnaassapput.
Tamannali iluatsinneqassappat ilinniartut tamarmik ilinniakkaminnik naammassinnittariaqarput, aamma maanna sulisorineqartuni, pingaartumik Nuummi, taarseraattupilussuullutillu napparsimallutik sulinngitsuukulasuni suliunnaartoqannginnissaa pisariaqassaaq.
Nunatsinni inissiisarfinni paarsisut
Nunatsinni inissiisarfinni paarsisutut atorfeqartut ullumikkut 75-80-iupput, taakkunannga 29-t nuummiillutik.
Nuummilu atorfinnit 29-usunit 19-iinnaat maanna inuttaqarput.
Nuummi inissiisarfittaaq 2019-imi ukiakkut ammarneqarpat Nuummiinnaq inissiisarfinni paarsisunik pisariaqartitsineq 63-inut qaffassaaq.
Nunatsinni Inissiisarfimmi paarsisup tunngaviusumik akissarsiai 18.300 koruuniupput, Danmarkimilu parnaarussivinni paarsisut tunngaviusumik akissarsiaat 23.000 koruunit missaanniillutik.
Kilde: Fængselsforbundet
- Maanna atorfinitsitagut atorfimmiiginnassappata assut tupaallaatigissavara. Misilittakkavummi taamatut takutitsinngillat, René Larsen taama oqarpoq.
Nunatsinni Pinerluuteqarsimasunik Isumaginnittoqarfimmi pisortap, Naaja Nathanielsenip, paasissutissiissutigaa maannakkorpiaq ilinniarniarlutik nalunaarsimasut nutaat naapertorlugit sulilersitsinissamut anguniakkatik anguneqartussatut isikkoqartut.
AAMMA ATUARUK Sara Olsvig inatsiseqarnermut ministerimut kissaaterpassuaqartoq
Nuummili inissiisarfittaami paarsisut amerlanersaat ukiumik ataasiinnarmik sivisusseqartumik atorfeqarsimassasut René Larsenip erseqqissaatigaa.
Suliassaannullu tunngatillugu tamanna ajornartorsiutaavoq, kattuffimmi allatsi isumaqarpoq.
- Inissiisarfimmi nutaarluinnaq ammasunik matoqqasunillu immikkoortortaqartoq ingerlatsinikkut aallartisartussaavaat, aamma piffissami killiligaanngitsumik pineqaatissinneqarsimasut ullumikkut Herstedvesterip Parnaarussivianiittut Nuummut nuutsittussaavaat, isumannaallisaanikkullu suliassat pineqaatissinneqartullu atassuteqarfiginerinut suliassat ingerlatiinnarlugit, René Larsen oqarpoq.
Parnaarussivinni sulisut kattuffiat naapertorlugu, nunatsinni inissiisarfinni paarsisunik amigaateqartoqarneranut akissarsiatigut atugassarititaasut ajorpallaarnerat pissutaanerpaavoq.
