GBU-mi siulittaasuugallartoq eqqunngitsumik oqaluttoq
GBU-mi siulittaasuugallartoq, Gert Fleischer naapertorlugu kattuffiup siulersuisuini amerlanerussuteqartut Tekle Ghrebrelulip tusagassiutit akuerineqaqqaarnani ilaatigut oqaaseqarfigisimammagit soraarsinneqarpoq. Tamannalu nunanut allanut unammisartunut sungiusaasup isumaqatigiissutaa malillugu eqqunngitsuliornerusoq, Gert Fleischerip oqaatigaa.
- Nunanut allanut unammisartunut sungiusaasup isumaqatigiissutini pituttoqqaffigalugu isumagisussaavaa. GBU-p ilanngutitinneqarneranut suliani tusagassiutit attavigitinnagit siulersuisut ilisimateqqaartussaavai. Uagulluunniit siulersuisuni ilaasortaasugut tusagassiutinut siulersuisut ilisimateqqaartinnagit pisunut tunngasunik oqaaseqarsinnaatitaanngilagut, Gert Fleischer soraarsitsineq pillugu Sermitsiamut oqarpoq.
KNR-ip Tekle Ghreblelulip GBU-llu akornanni isumaqatigiissut pissarsiaraa. Isumaqatigiissut marlunnik qupperneqartoq, GBU-mi siulittaasuusimasup, John Thorsenip, nunanullu allanut unammisartunut sungiusaasuusimasup atsiorsimavaat. Tekle Ghreblelul tusagassiutinut oqaaseqartigani siulersuisut attavigeqqaartassagai isumaqatigiissummi arlaannaaniluunnit allassimanngilaq.
Nipangiusimasussaatitaaneq isumaqatigiissummi allassimasoq tamatumunnga qaninnerpaavoq. John Thorsenip nipangiusimasussaatitaaneq tusagassiutinut oqaaseqarnissamut attuumassuteqanngitsoq KNR-imut qoaatigaa.
AAMMA ATUARUK DBU GBU-p soraarsitsineranut akulerunnianngitsoq
Taamaammat KNR-ip Gert Fleischer sooq taama oqaaseqarsimaneranik apeqquteqarfigaa. Gert Fleicherip taama oqaaseqarsimanani sisamanngormat oqaatigaa. Sermitsiallu Gert Fleischerip oqaaserisai ilumuunngitsumik allassimassavai.
Sermitsiap isornartorsiuineq paasisinnaanngilaa. Aviisillu aaqqissuisuisa Gert Fleisherip apersorneqarnera immiussaatiginerarpaat sisamanngormallu tusarnaaqqikkamikku Gert Fleischerip oqarneqarnerarnera allanngortinnissaanut peqqutissanik nassaaratik.
AAMMA ATUARUK Sungiusaasup soraarsitaanera aalassaataasoq nunarsuaq tamakkerlugu allaaserineqartoq
KNR-ip Gert Fleischer GBU-llu siulittaasuata tullia, Kent Kielsen tallimanngormat oqaloqatigai. Taakku arlaannaataluunniit Tekle Ghreblelulip tusagassiutinut oqaaseqarniarnermini siulersuisut attavigeqqaassagai isumaqatigiissutip suani allassimanersoq oqaatigiumanngilaat.
- Tekle tusagassiutinut attaveqartinnani siulersuisunit akuerineqaqqaartarnissaanut isumaqatigiissut uanga suliarinngilara. Aatsaat ippaassaani (pingasunngormat, aaqq.) Teklemut isumaqatigiissut atuarluarpara, Gert Fleischer KNR-ip tallimanngormat ualikkut oqaloqatimmagu oqarpoq.
AAMMA ATUARUK GBU-mi siulittaasoq soraarsitsisoqareersoq tunuarpoq
AAMMA ATUARUK Isikkammik arsaattartunut sungiusaasoq soraarsitsisoqarnera akerleralugu tunuartoq
Tamatuma saniatigut apeqqutinut allanut akissuteqarumanngilaq inuulluaqquseriarlunilu oqarasuaat ilillugu.
Tekle Ghreblelulip soraarsinneqarnissaa siulersuisuni amerlanerussuteqartunit aalajangerneqarpoq. Maanna siulittaasuusimasup, John Thorsenip soraarsitsineq isumaqatigisinnaanngilaa kinguneratigullu siulersuisunit tunuarpoq. Tekle Ghreblelulip nunanut allanut unammisartunut sungiusaasoqataata, Rene Olsenip soraarsitsineq aamma isumaqatigisinnaanagu GBU-mit atuuffini tunuarfigai.
Tamatuma kingornatigut nunanut allanut unammisartut arlallit sungiusaasumi, Tekle Ghreblelulip soraarsitaanera isornartorsiungaatsiarpaat. Siulersuisullu maanna atuuttut GBU-mi susoqarneranik aalajanngiisussaaginnarniarpata nunanut allanut unammisartunit tunuarnissaminnit siorasaaralutik.
