Uranimut inatsisissatut siunnersuut Atassutip tapersersoraa

Inatsisissatut siunnersuut partiimit nuannaarutigineqarpoq, taamaattorli aatsitassarsiorniat tamarmik eqqorneqartariaqanngitsut isumaqarlutik.
- Ersereerpoq maannakkumut innuttaasut qinersinerat isigissagaanni uranimut naaggaartutut nipeqartuusut partiit erseqqarissumik oqariartuuteqartut amerlanerussuteqarlutik oqariartornikuupput, taakkulu aamma ataqqisassaapput. Assi © : KNR
Allattoq Nauja Møller, Marie Kûitse Kristensen, Anders Dall
juulip 08-at 2021 11:19

Naalakkersuisut piginneqatigiiffinnik uranimik misissueqqaarnermut, ujaasinermut piiaanermullu inerteqquteqarnissamik inatsisissatut siunnersuuteqarnerat, partiip ikorfartortaasup Ataassutip taaseqataaffigerusuppaa, partiip siulittaasuat, Aqqalu Jerimiassen oqarpoq.

- Akuersinissaq tassani ammaffigineqarsinnaavoq, innuttaasut taamannak oqariartornerat malinniaraanni, Aqqalu Jerimiassen oqarpoq.

Taassuma Inuit Ataqatigiit Kuannersuarni aatsitassarsiornerup unitsinneqarnissaa qineqqusaarutigimmassuk qinerneqangaatsiarnerat innersuussutigaa.

- Ersereerpoq maannakkumut innuttaasut qinersinerat isigissagaanni uranimut naaggaartutut nipeqartuusut partiit erseqqarissumik oqariartuuteqartut amerlanerussuteqarlutik oqariartornikuupput, taakkulu aamma ataqqisassaapput.

Inatsisissatut siunnersuut tusarniaassutigaat

Inatsisissatut siunnersuut maanna tusarniaassutigineqarpoq, inatsisissatullu siunnersuutip uraninaanngitsunik nunatsinni aatsitassarsiornissamut kalluarsinnaaneraa partiip siulittaasuata ernummatigaa.

AAMMA ATUARUK Naalakkersuisoq: Uranimut akuersaanngilluinnarnerup atuutileqqinnissaanut alloriarneq siulleq

Uranimik misissueqqaarnermut, ujaasinermut piiaanermullu inerteqquteqarnissamik Naalakkersuisut siunnersuuteqarput. Ujaasinermut piiaanermullu atatillugu uranip imaqassusissaanut politikkerit killiliisariaqarsimapput. Assersuutigalugu aatsitassanik allanik soorlu gultimik kanngussamilluunniit.

Pinngoqqaatinut ulorianartunik qinngornilinnut allanut misissueqqaartoqassappat, ujaasisoqassappat piiaasoqassappallu piiarneqarniartut 0,01 procentimik uraneqarnissaannik killilerneqartoq siunnersuummi allaqqavoq.

Aatsitassarsiuleqatigiiffinnit uranisiortoqangikkaluarluni assanneqartuni uraneqarsinnaanera avaqqunneqarsinnaanngitsoq, Kommune Kujallermi aatsitassarsiornermut siunnersortip geologiusup Ole Christiansenip KNR-imut oqaatigaa.

Pisumiit pisumut nalilersuisoqartariaqarpoq

Unali Kuannersuarnut tunngatillugu aatsitassarsiornissamut inerteqquteqarneq Aqqalu Jerimiassenip paasisinnaalluarpaa, taannami illoqarfik Narsamiit 7,5 kilometerisut qanitsigisumi inissisimavoq.

AAMMA ATUARUK Aatsitassanut inatsisitaassaq illuatungiliuttut ernummatigaat

Uraninillu aatsitassarsiorfiusinnaasut najugaqarfinnut inoqarfinnullu ungasittut immikkut aatsitassarsiorsinnaanermut inatsiseqartariaqartut taanna isumaqarpoq.

- Nunali tamakkerlugu ataatsimut isigissagaanni nalilersoqqitassaq tassaniippoq, ungasissorujussuarmiippat inunnit orninneqanngisaannartumi, nunatsinni iluaqutaasinnaappat nalilersuisuinnaaneq tassani eqqarsaatigineqarsinnaavoq, Aqqalu Jerimiassen oqarpoq.

Aamma atuaruk