Najugaqartitsineq ilaasortamut ataatsimut 125.000 koruuneqartoq

Ukiumut 2,5 millionit koruunit. Inatsisartuni ilaasortat 21-t Nuup avataaneersut najugaqartinneqarnerinut aningaasartuutaasartut taama amerlatigipput.

Inatsisartoqarfik kisitsisit taakku tunngavigalugit natsisartuni ilaasortat Nuup avataaneersut najugaqarfissaannik inissialiortitserusuppoq. Inatsisartut siulittaasoqarfiat naapertorlugu maanna aaqqiissutaasumut naleqqiullugu ineqarnermut ukiumut aningaasartuutaasartut affaannanngortinneqarsinnaapput.

Inissialiortitsinissamik isumassarsiaq Inatsisartut suleriaasiat pillugu ataatsimiititaliami, partiinit siulittaasoqarfimmi ilaaasortaatitaqartunit aamma Atassummit Partii Naleqqamiillu peqataaffigineqartumi eqqartorneqarpoq. Lars-Emil Johansen Inatsisartut siulittaasuattut ataatsimiititaliami peqataavoq.

- Inissianik attartuinermut aningaasartuutivut qaffasissupilussuupput, aamma Inatsisartut namminneq piginngisaannik inissianik attartuisarnermut taarsiullugu inissianik najugaqarfissanik nammineq pigisanik sanaartornissaq isumaliutigaarput, KNR-imut taama oqarpoq.

Inatsisartuni ilaasortat 21-t upernaakkut ukiakkullu ataatsimiinnerni qaammatini tallimanik sivisutigisuni inissiani attartortakkani, akunnittarfinni akunnittarfiillu inissiaataanni maannakkorpiaq najugaqartarput. Najugaqartitsineq qaammammut agguaqatigiissillugu ilaasortamut ataatsimut 125.000 koruuneqarpoq, katillugit 2,5 millionit koruunit, taakkulu Inatsisartoqarfiup akilertarpai.

Sipaangaatsiartoqarsinnaasoq

Inatsisartut siulittaasoqarfiat tusagassiorfinnut sapaatit-akunnerani matumani nalunaaruteqarluni allappoq, Nuup ilaani Noorlernut-mi Inatsisartunut ilaasortat najugaqarfissaannik inissialiortitsinikkut ineqarnermut akiliutinut aningaasartuutit affaannanngortinneqarsinnaasut.

Siulittaasoqarfiup ilisimatitsissutigaa siunissami ineqarnermut akiliutit qanoq-innissaannik missingiutaasut Ineqarnermut, Sanaartornermut Attaveqarnermullu Naalakkersuisoqarfimmit pissarsiarineqartut tunngavigalugit taamatut naatsorsuisoqartoq.

Nutaanik sanaartornissaq pisariaqartoq

Sipaaruteqarniarnerli akikitsuinnaanngilaq. Noorlernut-mimi nutaamik sanaartortoqassappat tamanna millionerpassuarnik akeqassaaq. Inissiarsuarmik 32-nik inissiartalimmik sanaartornissamut missingiutaasoq upernaaq saqqummiunneqartoq naapertorlugu 54 millionit koruuneqassasoq, Naalakkersuisoqarfimmit kisitsisit takutippaat.

Kingornali inissiat 22-nut ikilisinneqarsimasut, naalakkersuisoqarfiup Siulittaasoqarfimmut ilisimatitsissutaani atuarneqarsinnaavoq. Inissialli ikilisinneri sanaartornermut aningaasartuutissanut qanoq sunniuteqassanersoq ilisimatitsissutigineqanngilaq.

Misissuinissamut aningaasanik immikkoortitsisoqarpoq

Inatsisartut suleriaasiat pillugu ataatsimiititaliaq 2017-imut aningaasanut inatsimmi 3 millionit koruuninik immikkoortitsisoqarnissaanik siunnersuuteqarpoq. Suliniutip aallartisarneqannginnerani inissianik qanoq amerlatigisunik pisariaqartitsisoqarneranik, sanaartorfissap qanoq-issusianik sanaartornerullu qanoq akeqarnissaanik misissuinissamut aningaasat taakku atorneqassapput.

- Pilersaarusiornermiippoq maanna, aamma sanaartortoqarnissaanik suli aalajangiisoqanngilaq. Sanaartortoqarsinnaanersorli misissorusupparput, Lars-Emil Johansen taama oqarpoq.

Millionerpassuimmi taakku inissianut innuttaasunut attartortittakkanut nalinginnaasunut atorneqarsinnaanngillat, taakkumi aamma amigaatigineqaqaat?

- Najugaqarfissamik inissialiortitsinissamik suliniummik aallartitaqanngilagut. Inatsisartuni ilaasortat najugaqarfissaannik inissiamik, maannakkut pissutsinut naleqqiullugu akikinnerusumik pitsaanerusumillu atugassaqartitsiffiusumik sanaartortoqarsinnaaneranik misissuinissamut pilersaarusiornissamullu aningaasanik qinnuteqaateqarpugut, Lars-Emil Johansen taama oqarpoq.

Ilaasortat Inatsisartut ataatsimiinnerini najugaqarfigisinnaasaannik nutaamik inissialiortitsinissamik isumassarsiaq  tapersersorlugu aamma oqaatigaa.

- Isumassarsialatsialaasoraara. Maannami aaqqiissutaasoq akisuupilussuuvoq, aamma akikilliartornissaa ilimanaateqanngilaq. Killormoortuanilli akisunerulissaaq, Inatsisartut siulittaasuat Lars-Emil Johansen taama oqarpoq. 

Sanaartortoqassappat tamatumunnga aningaasaliissutissat 2018-imut 2019-imullu aningaasanut inatsisini immikkoortitsisoqassaaq.