Ikiuiniartoqalernera qujamasuutigaat

- Ajornartorsiornitta tusarneqarsimanera soorunami nuannaarutigaarput, Mads Ole Kristiansen oqarpoq. Taassuma qimmini pingasut naalliunnissaat pinngitsoortinniarlugu toqutsiinnartariaqarsimavai.

- Qimminut nerukkaatissaqarniarneq kipiluttunarsivoq, qilalukkanik aarrinillu pisassiissutit qaffanneqartuuppata tusagassiuutit aqqutigalugit ikiortissarsiortarnerput unissagaluarpoq, Mads Ole Kristiansen oqarpoq.

Piniartoq alla, Aabilannguaq Simigaq, qimminik marlunnik annaasaqareerpoq.

- Qimmit toqorartut isiginnaaginnarlugit nuanninngilaq, Aabilannguaq Simigaq oqarpoq. Taanna motooriminik aserortoornermi kingorna piniariarluni aallarsinnaasimanngilaq.

- Qimmikka piffissami sivisuumi neqitugassaqarnikuunngillat,  nuliama akissarsianngui iluaqutaanngitsuuppata perlilernerusimassagaluarput, Aabilannguaq Simigaq oqarpoq.

Qaanaami pissutsit ilungersunartorsiortut politikerit akornanni maanna oqallisaalerput. Aleqa Hammond Siumumeersoq naalakkersuisunut saaffiginnittunut maanna ilannguppoq.

Avanersuarmi aaveqassuseq qanoq annertutiginersoq kingullermillu qanga aaveqassutsimut kisitsisoqarnersoq taassuma naalakkersuisunut apeqquteqaatigaa. Taamatuttaaq Avanersuarmiut qimmiminnut nerukkaatissaqarumallutik immikkut aaffattassiisoqarneratigut aaveqassutsimut qanoq annertutigisumik sunniuteqarsinnaanera apeqquteqatigaa.

- Qimmeqanngikkunik piniarsinnaanngillat taamaammat piujuartitsinissaq eqqartorneqartillugu piniartut piujuarnissaat aamma eqqarsaatigineqartariaqartoq isumaqarpunga. Aamma piujuartitsineq pineqartillugu inuit inuuginnarsinnaanissaat imminnullu pilersorsinnaanissaat ilanngullugu pingaartutut nalilersuutigineqarluinnartariaqartoq isumaqarpunga, Aleqa hammond paragraf 37 naapertorlugu apeqquteqaatimini allappoq..