Ikiuiniarnermut 1 million koruunit
Kalaallit Røde Korsiat Naalakkersuisunit millionip affaanik sapaatit akunnerani kingullermi tunineqarpoq. Afrikap kangiatungaani kaannersuarmit eqqugaasut siorna septembarimi nuna tamakkerlugu katersuiniunneqarmata, Naalakkersuisut aningaasat immikkoortissimasaat tassa tunniunneqarput.
Afrikap kangiatungaamiunut aningaasanik katersineq naammassimmat 502.879 koruuninik katersuisoqarsimavoq, tassa Kalaallit Nunaata inui tamarluinnarmik agguaqatigiissillugu 10 koruuninik tunissuteqarsimallutik. Naalakkersuisut millionip affaanik maanna tunissuteqarmata Afrikami inuit atugarliortut katillugit 1 millionit koruunit sinnilinnik Kalaallinit tunineqarput.
Kalaallit Røde Korsiannut aningaasanik tunisinermut atatillugu Naalakkersuisoq Maliina Abelsen siorna septembarimi nuna tamakkerlugu katersuiniarneq pillugu ima oqarpoq:
- Nuna tamakkerlugu katersuiniartoqarmat nammineq kajumissuseqarneq aallaavigalugu sullissineq qanoq iluaqutaasinnaatiginersoq takutinneqarpoq, nunaqqatittalumi inoqatiminnik ikiuerusussuseqarnerat aamma tassuunatigut takutinneqarpoq, Maliina Abelsen oqarpoq.
Naalakkersuisut tunissutaat Kalaallit Røde Korsiata nuannaarutigaa, aningaasallu tunniunneqartut Røde Korsip Afrikap kangiatungaani ikiuiniarfianut ingerlateqqinneqartut, Tove Blidorf ullumi nalunaaruteqarpoq.
