IKIU-mut saaffiginnissutit qaammatit aqqanillit ingerlanerini 956-iusimapput

IKIU inatsisilerinikkut piginnaanilinnik nammineq kajumissutsiminnik 12 -15-inik sulisoqarpoq, taakkulu Inatsisinut tunngasunik Ikiuisarfimmut Namminersortumut saaffiginnissutit akissuteqarfiginissaannut ikiuuttarput.

-Sapinngisamik ullut tamaasa nal. 15 - 17 innuttaasunik oqaloqateqartoqartarpoq, qassit saaffiginnissimanersut apeqqutaatillugu. Inatsisinut tunngasunik siunnersuisut qaammammut ulluni aalajangersimasuni sulinngikkaangamik ullormi aalajangersimasumi sulinissaminnik noqqaassuteqartarput. Tamannalu aallaavigalugu sulinerput aaqqissuuttarparput, IKIU-mi allattoqarfimmi pisortaq Sofia Rossen knr.gl-imut oqaluttuarpoq.

Inatsisinut tunngasunik Ikiuisarfik Namminersortoq Justitsministeriaqarfimmit Danmarkimilu Civistyrelsimit akuerisaavoq Kalaallit Nunaannilu pinerluttunik isumaginninnermut inatsimmi §84 imm. 5 malillugu tapiiffigineqartarluni. Inatsisinut tunngasunik ikiuisarneq taama ittoq inuiaqatigiinni ineriartortuni pisariaqarluinnarpoq. Aamma inuit pikkorissut siulersuisuni ilaasortaapput.

-Siulersuisuni siulittaasoq tassaavoq Michael Thumand, Nuna Advokaterini eqqartuussissulerisuusoq. Siulersuisunuttaaq ilaasortaapput Mille Søvndahl Pedersen aamma Birgit Skriver Nunatsinni Eqqartuussiveqarfimmeersut aamma Thomas Trierilu aamma Nunatsinni Eqqartuussiveqarfimmiissimasoq, Sofia Rossen oqarpoq.

IKIU pillugu uani paasissutissat amerlanerusut atuarsinnaavatit: www.ikiu.gl