Ikittuinnaat inuiaqatigiinni kiffartuussinissamik pineqaatissinneqartarput
Nunatsinni pinerlunnermut tunngasunik ilisimatusarsimasoq Leif Senholt KNR-imut oqarpoq, pinerluttut pineqaatissinneqareersut utaqqisullu ikilisinneqassappata, inuiaqatigiinni kiffartuussinermik pineqaatissiineq illoqarfinni eqqartuussiviit atornerusariaqaraat.
Illoqarfinnili eqqartuussiviit tamanna akisussaaffiginagu oqaatigaat.
- Ila uagut akisussaaffiginngilarput inissiisarfiit qanoq amerlatigissanersut, Illoqarfinni Eqqartuussivinni eqqartuussisut peqatigiiffianni siulittaasoq, Myrna Lynge oqarpoq.
Pineqaatissinneqarsimasunut Kangerlussuarmi inissiisarfiugallartoq, ukiup ataatsip matuma siorna matuneqarmat, inissiisarfinnut utaqqisut 300-t tungaanut amerlipput. Tamannalu tunngavigalugu, Pinerluttunik Isumaginnittoqarfimmi pisortap, Thomas Nicolajsenip siunnersuutigaa, inuiaqatigiinni kiffartuussinermik pineqaatissiisarneq sinerissami eqqartuussivinni atugaanerusariaqartoq. Tamanna pillugu Myrna Lynge ima oqarpoq.
- Isumaqarpunga unnerluussisussaatitaasut, illersuisuusut uagullu eqqartuussisut akisussaaqataasariaqartugut. Inuup eqqartuunneqartup nalilersorneqarnissaanut illersuisut annertuumik sunniinissaminnut periarfissaqarput. Aammali oqaasiinnaassanngippat, unnerluussisussaatitaasut akisussaaffeqarput annertoorujussuarmik, Myrna Lynge oqarpoq.
Inuiaqatigiinni kiffartuussinissamik pineqaatissiisinnaaneq 2010-mi januaarip aallaqqaataani atuutilerpoq. Tamassumalu atuutilernerata kingorna, Illersuisut peqatigiiffiata siulersuisuunerini ilaasortap, Tom Ostermannip ataasiaannarluni misigaa illersugaata inuiaqatigiinni kiffartuussinissaanut pineqaatissinneqarnera.
- Inuiaqatigiinni kiffartuussinissamik pineqaatissiineq atuutilermalli ataasiaannarlunga misigaara illersukkama taamatut pineqaatissinneqarnera, Tom Ostermann oqarpoq.
Ataasiaannarlugu iluatsinneranut pissutaasunut ilaavoq, unnerluussisut pisussaaffigisaat, tassaasoq eqqartuunneqartup eqqartuunneqannginnerani taassuma inuttut tunuliaqutaanik misissuisannginneri, tassalu tamanna tunuliaqutigalugu eqqartuussiviit inissiisarfinnut pineqaatissiisarneri amerlavallaartut, Tom Ostermannip oqaatigaa.
- Uani ajornartorsiut annerpaaq tassaavoq, pinerluuteqarsimasunik pineqaatissiinissamik inassuteqartuusartut aallaavigisarmassuk pinerluuteqartut inissiisarfiinut inissinneqarnissamik kissaateqartarneri. Tassalu tamanna aallaavigalugu eqqartuussivinnit takorusunneqartarpoq inuup tunuliaqutaanik misissuinerit inerneri, taamaattoqarpiarnerlu ajormat tamanna eqqartuussiviit aallaavigalugu pineqaatissiisarlutik, illersuisoq Tom Ostermann oqarpoq.
Pineqaatissinneqarsimasut 296-it inissiisarfinni inissaqalernissartik utaqqivaat. Politikkikkut oqartussat ataatsimeeqatigeereernerisa kingorna paasinarsivoq piffissami qaninnermi tamanna aaqqiissutigineqassanngitsoq.
Danmarkimi Inatsiseqarnermut ministerip, Morten Bødskovip oqaatigaa inissiisarfinnik amerlanernik sanaartortoqarnissaanut aningaasaliisinnaanani siunnersuutigaluguli pinerluttunik isumakkeerinninneq aaqqiissutaasinnaasoq. Tamannalu Nunatsinni politikerinit isumaqatigineqanngilaq.
