Ikittuinnaat Danmarkimi SU-mik qinnuteqartarput
Kalaallit ilinniagaqartut ikittunnguit, qallunaat ilinniartoqatimik atugarisaasa assinganik atugaqarusullutik, Danmarkimi ilinniagaqarnersiutit toqqarsimavaat, tamannami inatsisartut upernaakkut ataatsimiinneranni ilinniartitaanermut Naalakkersuisup kaammattuutigimmagu. Ammami taamaaliunnginnissamut pissutissarpassuaqarpoq, ilinniartunut siunnersorti taama naliliivoq.
- Danmarkimi ilinniagaqarnersiutinut nuukkunik pitsaaquterpaalussuit annaassavaat, tamannalumi uggornartuussaaq, kalaallinut Københavnimi ilinniartunut siunnersorti Pia Rosing Heilmann oqarpoq.
Danmarkimi ilinniartunut sianeqattaarluni paasiniaanikkut paasinarsivoq, kalaallinit ilinniagaqartunit 500-uusunit, taamaallaat qulit Danmarkimi ilinniagaqarnersiuteqarnissartik toqqarsimagaat.
Kalaallit ilinniagaqartut Danmarkimi ilinniartoqatimik atugarisaasa asserluinnaanik atugaqalernissaat, ilaatigut bussinut qimuttuitsunullu akikilliliivigineqartalernissaasa qulakkeerneqarnissaanik Siumup siunnersuutaa, Inatsisartuni amerlanerussutillit itigartippaat.
Tamanna akisuallaassasoq, ilinniartitaanermut naalakkersuisup Palle Christiansenip tunngavilersuutigaa, kalaallillu Danmarkimi ilinniagaqartut atugarisaasa pitsanngorsarneqarnissaat pillugu Naalakkersuisut suliaqarlutik aallartereersut erseqqissaatigalugu.
Kalaallit ilinniagaqartut Danmarkimi ilinniagaqarnersiutinut nuunnissaannik Palle Christiansenip kaammattoraluarpai.
Naak kalaallit ilinniagaqarnersiuteqartitseriaasiat amigateqarsinnaagaluartoq, Danmarkimi ilinniagaqarnersiutinut nuunnginnissaq pissutissaqarluartoq, Pia Rosing Heilmann oqarpoq.
Kalaallit ilinniagaqarnersiuteqartitseriaasiata pitsaaqutaasa ilagaat tagiartortinnermut kigutillu nakorsaanukarnermut akiliunneqartarneq kiisalu minnerunngitsumik akileraarutinut akiliinngikkaluarluni amerlanerusumik isertitaqarnissamut periarfissaqarneruneq.
- Kalaallit ilinniartut naakkinartunngortinnissaat taamalu pilliutigineqarnissaat mianersuutigisariaqarpoq, Pia Rosing Heilmann oqarpoq.
Qitornartaartussaagaanni Danmarkimi ilinniagaqarnersiutinut qinnuteqarnissaq piukkunnaateqarpoq, tassami aaqqissuussineq najoqqutaralugu qaammammut marloriaammik ilinniagaqarnersiutinik pissarsisoqarsinnaammat.
Ukiumut ataasiarluni angalanissamut akiliunneqartarneq, kalaallit ilinniagaqarnersiuteqartitsinerannut ilaanissamut siornatigut tunngavilersuutigineqartarpoq, kisiannili aamma maannakkut Danmarkimi ilinniagaqarnersiuteqartunut akiliussisarnissaq aamma neqeroorutaalerpoq, tamatuma aningaasanut inatsimmi qulakkeerneqarneratigut.
