Ikiorsiissutinut tunngasut anngunneqarluartut
Ikiup atuisut pisinnaatitaaffiinik, inunnik isumaginninnermut tunngasunut, ineqarnermut tunngasunut, kiisalu sulisilluni ajoqusernernut isumannaarinermut tunngasunik ikiuinissamut siunnersuisartut Kisaq angallatigalugu paasisitsiniaaqatigai.
Illoqarfinnullu tallimanut, taakkualu nunaqarfiinut, angalareerlutik Ilulissanut ippassaq tikipput.
Inatsisinut tunngassuteqartunik ikiuisarfimmi Ikiumeersup, Sofia Rossenip, oqarneratut illoqarfinni nunaqarfinnilu tallimani tikinneqartuni paasisitsiniaaneq soqutigineqarluarpoq:
- Saaffiginnittut socialimut tunngasut amerlasoorujussuupput. Tupaallaatigivarput taama amerlatigisut uagutsinnut saaffiginnimmata suliallu annertullutik. Ajoraluartumik tassa uagut isumaqarpugut inatsisit tassunga tunngasut ilisimaneqarpianngitsut, sullissisuninngaanniit inatsisit tassa ilisimaneqarpianngitsut, Sofia Rossen, Ikiumi allaffimmi pisortaq taama oqarpoq. Taassuma oqaluttuaraa inuit 100-it tungaanut Ikiumut saaffiginnissimasut Kisap Maniitsumiit Saqqap tungaanut ingerlaarnerani:
- Soorlu inuit saaffiginnittarput ikiorsiissutinik kommuunimut qinnuteqartut itigartitaasarneri. Taavalu aamma itigartitaagaangamik oqaatsitsitigut kisimik itigartinneqartarlutik allakkatigut allakatigut itigartinneqartaratik. Taanna ajornartorsiutitut uagut assut isigivarput, Sofia Rossen oqarpoq, imalu itisiliilluni:
- Isarussanut qinnuteqarlutik itigartitaasartut, taavalu aamma soorlu utoqqalinersiutinik isertitallit, ilaatigut aningaasatigut amikkittooraangamik kommuunimut ukiorsiutinik piserusullutik itigartitaasarneri, taakkua eqqarsarnartorujuusinnaapput, Sofia Rossen oqarpoq.
Ikiu malillugu inunnik isumaginninnermi tunngassuteqartunut saaffiginnittarnernut ersiutaavoq kommuunit pisortat ingerlanneqarnerannut inatsisinik atuilluannginnerat, soorlu qinnuteqartunut allakkatigut akisarsimannginnerat.
