Ikinngutigiittut isumaqatigiissusiorneq qalipakkani malunnartippaat
Kommuneqarfik Sermersuup aamma Lyngby-Tårbæk-ip kommuniata ikinngutigiinneq ullumi naqissusermassuk qalipakkat marluk sanallugit aallartinneqarput taakkulu kommuneqarfiit takku marluk borgmesteriisa allaffiini nivingalerumaarput.
- Imminnut qalipakkanik sanaanniarluta iaumassarsivugut tassanngaanniillu ingerlaannaq piviusunngortipparput. Ullumi titarnerit siulliit titarneqarput taava eqqumiitsuliornermi ilinniarfimmi ilinniartut ilusilersuineq nangissavaat. Assut qilanaarpunga qalipakkat ukiamut naammassippata takunissaannut, Asii Chemnitz Narup qalipaatsiareerluni oqarpoq.
Taassuma borgmestereqataa Lyngby-Tårbæk-ip borgmesteria Søren P. Rasmussen aamma qalipaarusuummerpoq taassumalu Nuup eqqaani qaqqat Lyngby-Tårbæk-imilu kommunip allaffia akuleriisillugit qalipappai. Taanna aallartilluariivippoq takujuminaalluni aatsaat qalipaanermi misiliisoq.
- Assut pissanganarpoq assilialiorluni qalipaalluni. Inuunni qalipakkamik suliaqarsimanngisaannarpunga, kisiannili aallaqqaataaniit eqqarsaatigereerpara qalipakkanni ikinngutigiinnerput ersersinneqassasoq. Maanna neriuppunga eqqumiitsuliornermi ilinniartut suliaq nangikkumaaraat taamaasilluni qalipagaq kusatsinniassammat, Søren P. Rasmussen qungujulalluni oqarpoq.
Ullumi borgmesterit taakku marluk Nuummi pisuttuaqatigiipput aqagulu gaypride ingerlanneqalerpat ingerlaaqataaniarlutik, tassanimi Asii Chemnitz Narup Katuami biilit unittarfianni ammaalluni ullup qeqqata missaani oqalugiartussaavoq.