Ikinnerpaamik 400-t suliffissaarutissapput
Upernavimmi Upernaviullu nunaqarfittaani umiatsiaararsortut 170-it missaanniittut aalisarnertik ullut 14-it missaanniittut qaangiuppata unitsittussaavaat, umiatsiaararsortunut pisassiissutigineqartut taamanikkussamut nungussimassammata.
Aalisartut 6 meterinik anginernik aalisariutaatillit aamma naatsorsuutigisariaqassavaat aalisarnertik sapaatip akunneri arfinillit arfineq marlulluunniit qaangiuppata aalisarunnaarsimassallutik, piffissami pineqartumi pisassiissutigineqartut nungussimassammata.
Suliffeqarfik Upernavik Seafood Upernavimmi Upernaviullu eqqaani qaleralinnut tunitsiveqartitsisuuvoq. Ingerlatsivik qulingiluanik tunitsiveqartitsivoq, taakkunani arfineq marluk tunitsivineqartarlutik.
Ingerlatsivimmi pisortaq Flemming Andersen KNR-mut oqaluttuarpoq aalisarneq unippat kommuni aningaasaqarnermigut ilungersunartorsiulissasoq tunitsivinni nalunaaquttap akunneranut aningaasarsiaqartinneqartartut 199-it angerlartiinnarneqarpata.
- Aalisartut tunitsivinnilu sulisut imaannaanngitsumik atugaqartussanngortussaapput, Flemming Andersen erseqqissaavoq.
Aalisarsinnaanermut Akuersissutinik Nakkutilliisoqarfiup kisitsisaatai naapertorlugit Upernavimmi umiatsiaararsortut pisassaannit sinneruttut 287 tonsiupput, aalisartut aalisariutinik 6 meterinik anginernermik aalisariutaatillit pisassaannit sinneruttut 1.564 tonsiullutik.
Umiatsiaaqqat, umiararsortut 174-it aalisariutillu 6 meterinik anginerit Upernavik Seafoodimut aggustimi tunisipput.
Ingerlatseqatigiiffik kingullermik aningaasarsitsigami 199-nik nalunaaquttap akunnisiaqartunik sulisoqarpoq qaammammusiallillu 10-it sulisuullutik.
