Ikinnerpaamik 275-it suliffissaarutissasut
Uummannammut pisassassiissutigineqartunit, kisitsisit aggustip 27-anneersut takutippaat, umiatsiaararsortunut pisassiissutigineqartut 168 tonsit sinneruttut, 728 tonsillu aalisariutinut 6 meterinik anginernut sinnerullutik.
Uummannami aalisarnermut tunngasunik suliaqartoq, tutsiginartoq, KNR.gl-mut oqaluttuarpoq umiatsiaararsortunut pisassiissutigineqartut sapaatip akunera ataaseq qaangiuppat, ataasinngornermi septembarip 3-ani nungussimassasut. Agguaqatigiisillugu maannakkut ullormut 22 tonsit pisarineqartarput.
Uummannami Royal Greenlandip fabrikkianit ilisimatitsigineqarpoq, fabrikkimi qalerallerisut 60-it missaaniittut. Illorsuarni Uummannaq Seafood qaleraleriffiuteqarpoq, tassani 15-it missaanniittut sulisorineqarput.
Uummannammi aalisariutit 6 meterinik anginerit 43-it qaleralinniarsinnaaneminnut akuersissuteqarput.
Uummannamut qalerallit umiatsiaararsortunut pisassiissutigineqartut 3.730 tonsiupput, 2.270 tonsit aalisariutinut 6 meterinik anginernut pisassiissutaallutik, katillugit 6.000 tonsit.
Naatsorsueqqissaartarfiup kisitsisaatai naapertorlugit Uummannami juulimi suliffissaaleqisut 78-upput.
Qalerallit umiatsiaararsortunut aalisariutinullu 6 meterinik anginernut pisassiissutit nungunneri nungulerneriluunniit Qaasuitsup Kommunianut eqquisorujussuussaaq.
Qanittukkut allaaseraarput Upernavimmi aalisartut qalerallerisullu 400-it missaanniittut suliffissaarutissasut, Qasigiannguanilu Royal Greenlandip fabrikkiani sulisut 70-it sapaatip akunnerata tulliani angerlartitaassasut.
Qeqertarsuup Tunuani umiatsiaararsortunut qaleralittassiissutit nungummata umiatsiaararsortut 235-it aalisarunnaarput, Ilulissanilu qalerallerivik Halibut Greenland qalerallerisunik 30-it missaanniittunik sulisitsiunnaarluni.
Qaleralittassiissutit nungunneri nugussamaarnerilu ilanngullugit, matumani Uummannaq aamma ilanngullugu, aalisartut qalerallerisullu 1.000-it missaanniittut eqqorneqassapput.
