Ikiaroornartulerisut sisamat nunatsinnit anisitaasut
Eqqartuunneqartut tallimat Romaniameersuupput ataaserlu Ungarnimeersuulluni.
Hashi eqqunneqartoq anginerpaaq 7,1 kiiluusimasoq, KNR-imi tusagassiortup, Arnaq Nielsenip, eqqartuussisup, Johanne Bankep, oqaloqatiginerani paasivaa.
Eqqartuunneqartuni arfinilliusuni sisamat takornariatut nunatsinniissimapput anisitaasussanngorlutillu pineqaatissinneqarsimallutik. Ilai marluk kalaallinik ilaqutaqalersimasut nunatsinniiginnassapput.
Pineqaatissinneqartut akiligassinneqarput. Akiligassani 1,7 millionit koruunit annerpaalluni 50.000 koruunilu minnerpaalluni.
Taakkua saniatigut pineqaatissinneqartut tamarmik immikkut 50.000 koruuninik akiliisussanngortinneqarput suliat ingerlarnganut akiliisussaagamik.
Pineqaatissinneqartuni pingasut ukioq ataaseq affarlu isertitsivimmiinnissamik pineqaatissinneqarput, ataaseq ukioq ataaseq qaammatillu pingasut marlullu qaammatini arfineq pingasuni isertitsivimmiinnissamik pineqaatissinneqartut.
Pineqaatissinneqartuni tallimat pineqaatissinneqarnertik akuerinagu Nunatta eqqartuussivianut suliaq suliareqqitassanngortikkaat Sermersuup Eqqartuussivia ilisimatitsivoq.
