Iisartagaq imigassamik atornerluinermut akiuussutissaq
Qaammatini arfinilinni misiligartinneqareermat paasinarsivoq imigassaq imertagaq 60 procentimik appartinneqarsimasoq.
- Imerajuttunut nakorsaatit assut amigaataasimapput, iisartakkallu taamaattut periarfissaapput, imerajuttut katsorsartinnissamik eqqarsaateqanngikkaluit taanna allaat periarfissatut isigilersinnaallugu, Lundbeck-imi pisortaanerup tullia Ole Chrintz oqarpoq.
Katsorsartikkusuttut Qallunaat Nunaanniittut Nunatsinniittullu soqutiginnilersimagunik utaqqilaartariaqassapput, iisartagarmi aallaqqaammut Norgemi, Finlandimi, Polenimi nunanilu Østersømut sinerialinni taamaalaat tuniniarneqaqqaassaaq.
Lundbeck malillugu aatsaavissuaq ukiut qulit ingerlanerini Europami imigassamik atornerluisunut katsorsaataasinnaasumik nassaartoqarpoq. Iisartakkamillu atuineq timimut sunniuteqarnerluttuusinnaasutut ilimagineqanngilaq, imerajuttullu imerunnaavittariaqarnatik.
Nakorsaasiorfimmiilli naqissuserneqarpoq, taassuminnga katsorsartissangaanni saniatigut aamma terapi atorlugu peqqissartittariaqassasoq, katsorsartittut imertakkamik appartinnissaannut kajumilersinniarlugit.
Iisartagaq Selincro ullut tamaasa pisariaqanngilaq, taamaallaalli katsorsartittup ulluni imernissaminut pileritsassimaffiini.
Nunarsuup ilaani imerajuttuuneq assut ajornartorsiutaavoq ingammik Europami, tamaanimi inuit 14 millionit ullormut imigassamik pinngitsoorinnissinnaanngillat.
