Igitsinimi pisut Sisimiunit aamma nuannaarutigineqarput

Mohamed Hassan sapaatip-akunnerini kingullerni pisumut qanimut malinnaasimavoq. Nulia Maannguaq Dalager taama oqarpoq.

- Aatsaannguaq tusarparput Igitsinimi præsidenti tunuartoq, taamaammat nuannaaqaagut, Maannguaq Dalager oqarpoq.

Ualimut nutaarsiassaqarfinniit nalunaarutigineqarmat, Mubarak præsidentitut tunuartoq, Maannguaq Dalager ingerlaannaq uiminut Igitsinimiuusumut sianerpoq.

- Uiga suligami, taamaammat nalugamiuk præsidenti tunuartoq. Sianerfigigakku nalunaarfigalugu præsidenti tunuartoq, inuttaa nuannaaqaaq, pisoq upperinngikkaluarpaaluuniit, Maannguaq Dalager oqarpoq.

Maannguaq Dalager uinilu Mohamed Hassan, ukiup aappaata qeqqa matuma siorna katipput. Maannguullu uia Mohamed Hassan nunatsinni ukioq ataaseq najugaqareerluni. Igitsinimi piffissami kingullerni pissutsit Mohamed Hassannimit qanimut malinnaavigineqarluarsimapput.

- Ullut siulliit sinilluartarpugut, kisianni ullut kingulliit uiga sinippiarneq ajorpoq pissutsinik malinnaanermik, Maannguaq Dalager oqarpoq.

Soorliuna Maannguaq Dalagerip uia Igitsinimi præsidenti tunuaqqusimagaa?

- Neriuuteqarami siunissami kiffaanngissuseq Igitsinimi atuutilissasoq, Maannguaq Dalager oqarpoq.

Kairomi akerliussutsimik takutitsisut ikigisassaanngitsut sapaatip-akunnerni kingullerni takussaassimapput, Maannguullu uia aamma nunaqqatini allat ilagalugit akerliussutsimik takutitseqataarusussimagaluarpoq.

Maannguaq Dalager uinilu Mohamed Hassan, ullumikkut ulloq pisoq, malunnartissanerarpaat.

- Naatsorsuutigaarput, ilaquttagullu katerisimaassalluta, Maannguaq Dalager nuannaarpalulluni naggasiivoq.

Mohamed Hassan pisoq pillugu oqaaseqartinniaraluarparput, inuttaali sulimmat oqaaseqartissinnaassimanngilarput.