Igasoq Ilannguaq Hegelund atuartunit nuannaartorineqarpoq

Ilannguaq Hegelund igasutut ilinniartuunermini ukiuni sisamanik sivisussuseqartumi, angajoqqaanut timersornernut allanillu sammisaqarnissaminut piffissaqarani ilinniarnermik aallussinera Marco Leibhardtimut nuannaartunarpoq.
Nuummi atuarfimmi Atuarfik Samuel Kleischmidtimi atuartut angajulliit siunissaq pillugu sammisaqarput. ASK-imi atuartuusimasut assigiinngitsutigullu inuussutissarsiutitigut suliaqarnermikkut iluatsitsimasutut taaneqarsinnaasut atuartunut angajullernut oqalugiarput, Julie Edel Hardenberg, Taekwondollammak Lauritz Heilmann aamma  demokraatit siulittaasuat Jens B. Frederiksen, taakua maligassiusinnaasutut isigineqarlutik atuarfimmut aggersarneqarput oqalugiarlutillu.   Igasoq Ilannguaq Hegelund igasutut ilinniartuunini pillugu oqalugiarmat Marco Leibhardt atorsinnaasamik paasisaqarpoq.
Atuarusussuseq piumassuseqarnerlu Marco ilinnialeruni atussavai.

Marco Leibhardt illussanik titartaasunngornissani siunniuppaa.
Atuartut angajulliit ulluni pingasuni siunissaq pillugu sammisaqartinneqarnerani oqalugiarfigineqarput, suliffeqarfiillu assigiinngitsut pulaarneqarlutik paasisassarsiorfigineqarput.
Siunissaq pillugu sammisaqartitsisarneq ukiut tamaasa pisartussatut siunniunneqarpoq.
Siunissaq pillugu ulluni pingasuni sammisaqartitsineq Marco Leibhardtip nuannarivaa, paasisaqarnarpoq aamma taamaalioqqikkusuppoq.