ICC: Paamik metanimillu mingutsitsineq minnerulersinneqarli
Naalagaaffiit arfineq pingasut aallartitaat Helsinkimi sapaatip akunnerani kingullermi katersuullutik paamik gassimillu mingutsitsinerup qanoq minnerulersinneqarnissaa oqallisigimmassuk, naggueqatigiit Inuit siunnersuisoqatigiiffiat peqataavoq. Pineqartummi Issittup kiannerulerneranut patsisaaqataalluinnarmata.
Pineqartunut atatillugu Issittup siuttuunissaa anguniagaavoq. Tassami soorlu sananeqaateeqqat paameersut sermersuup aakkiartorneranut pissutaaqataasut annersaat nunarsuatsinni suliffissuaqarfinneersuugaluartut, Nunarput umiarsuarneersunik, biilinit, kissarsuutinit aamma eqqaaviit ammaannartut ikuallanneqartarnerinit paamik mingutsitseqataammat.
- Issittoq nunarsuup ilaanut allamut naleqqiulluni marloriaammik kiatsikkiartorneruvoq. Tamatuma kinguneranik kulturerput ileqqutoqqavullu tatineqarput. Nunarsuarmiulli allat ajornartorsiummut iliuuseqaqqussagutsigik nammineerluta aamma iliuuseqartariaqarpugut, Parnuuna Egede ICC sinnerlugu Helsinkimi ataatsimeeqataasoq oqarpoq.
- Sananeqaateeqqat paameersut aamma nunap qeriuaannartup aakkiartornerata kinguneranik gassit ilaannik metanimik mingutsitsineq naggueqatigiit Inuit Nunatsinniittut, Akilinermiittut, Alaskamiittut Chukotkamiittullu inooriaasiat toqqaannanngikkaluamik sunnertarpaat. Taamaattumik Issittumi siunnersuisoqatigiit tamatumunga suliniuteqarnerisa malinnaaffiginissaat ICC-mut pingaaruteqarpoq, Parnuuna Egede erseqqissaavoq.
Issittumi Siunnersuisoqatigiit paamut gassillu ilaannut metanimut suliniutaanni isumaqatigiissutissaq 2015-imi piareerneqartussaq aallaavigineqarpoq.
- Isumaqatigiissut taanna atorlugu innuttaasut arlalitsigut peqataatinneqarnissaat ICC-mit neriuutigineqarpoq. Soorlu paasisitsiniaanikkut, maluginiakkanik paarlaateqatigiinnikkut aamma mingutsitsinermut minnerulersitsisinnaasunik periaatsinik assigiinngitsunik misileraanikkut, taamaalilluta nunagisatsinni mingutsitsineq nammineerluta minnerulersissinnaaniassagatsigu, Parnuuna Egede naggasiivoq.
