ICC-p siulersuisuata pisinnaatitaaffiit naalakkersuinikkut aaqqissuussinermi amigaatigigai
- Ulloq manna pingaaruteqarpoq ukiormi manna tassaavoq, Nunat Inoqqaavisa Pisinnaatitaaffiisa Naalagaaffiit Peqatigiinnit 2007-imi akuersissutigineqarneranniit ukiut 10-nngortorsiorneqarnerat, ICC-p Nunatsinni siulittaasua, Hjalmer Dahl oqarpoq.
Pisinnaatitaaffiilli nunani tamalaani nunatsinnilumi atuutilersinniarnerinut ilungersuuteqarneq sumut killinnersoq ukiut qulinngortorsiornermi aperissalluni pissusissamisoorpoq.
- Ullumikkumut nunat ataasiakkaaginnaat nunat inoqqaavisa pisinnaatitaaffii atuutilersillugit nunatut tunngaviusumik inatsimminnut ilanngutitinnikuuaat, Canadalu taamaaliornissamut alloriaateqarnissamik maanna nalunaaruteqarnikuulluni, ICC-p nunatsinni siulittaasua oqarpoq, erseqqissaatigalugu kunngeqarfiup Danmarkip nunattalu pisinnaatitaaffiit tapersernikuugaluarlugit maannamut suli ilanngutitsisimanngitsut.
ICC julip 16-ianniit 19-ianut Utqiagvimmi Alaskamiittumi ”Inuit – Issittoq uagut pilluta” qulequtaralugu 13-issaannik ataatsimeersuassaaq.
- Ataatsimeersuarnermi nunap inoqqaavisa pisinnaatitaaffiisa sukumiisumik eqqartorneqarnissaat siunertaraara, pingaartumik ukiuni qinigaaffiusuni sisamani atuutilersinneqarnissaannik anguniagaqarnissamik ilungersuuteqarnissaq anguniarlugu, Hjalmar Dahl oqarpoq pisinnaatitaaffiillu nunatsinni ukkatarineqarnerulernissaannut neriuuteqarnerarluni:
- Tassunga atatillugu naatsorsuutigaara Nunatsinni Tunngaviusumik Inatsisissaq pillugu Ataatsimiititaliap sulinermini nunap inoqqaavisa pisinnaatitaaffii ilanngullugit suliaqassasoq ICC-lu suliaqarnermi peqataatillugu, Hjalmar Dahl nunat inoqqaavisa ulluannut atasumik oqaaseqaateqarluni naggassiivoq.
AAMMA ATUARUK Kalaallit Nunaat nunarsuarmi nunap inoqqaavinut pingaaruteqarpoq
AAMMA ATUARUK Nunap inoqqaavisa Naalagaaffiit Peqatigiinni alaatsinaattunngornissaat kissaatigigaat