Jens Dahl: Kalaallit Nunaat nunarsuarmi nunap inoqqaavinut pingaaruteqarpoq

Nunap inoqqaavisa nunani tamalaaneersut sapaatit akunnerini makkuni New Yorkimi nunap inoqqaavisa ataavartumik oqaloqatigiittarfianni katersuupput.
Assi © : Udenrigsministeriet/Youtube
maajip 05-at 2017 07:17
Nutserisoq Connie Fontain

Nunarput nunarsuarmi nunap inoqqaavinut pingaaruteqarpoq.

Nunat inoqqaavisa soqutigisaat tunngavigalugit nunanit tamalaanit suleqatigiiffigineqartumi IWGIA-mi pisortaasimasoq, Jens Dahl KNR-imut taama oqarpoq.

Jens Dahl naalagaaffiit Peqatigiit nunap inoqqaavisa ataavartumik oqalotigiittarfianni siulittaasuinut ilaavoq New Yorkimilu ulluni makkunani ukiumoortumik ataatsimeersuarput.

Taassuma oqaatigaa, nunap inoqqaavisa ataavartumik oqaloqatigiittarfiat nunap inoqqaavisa nunarsuarmi ilisimaneqarnerulerneranut sunniuteqaqataasimasoq.

Nunap inoqqaavisa ataavartumik oqaloqatigiittarfiata 2002-mi pilersinneqannginnerani nunap inoqqaavi maluginiarneqarpallaanngillat. Tamannali allannguuteqarujussuarsimavoq.

Kalaallit nunap inoqqaavisa ataavartumik oqaloqatigiittarfianni suleqataasimasut inuit pisinnaatitaaffiinik anguniagaqarnerminni nunap inoqqaavinut allanut malunnavissumik sunniuteqarsimapput.

- Nunat tamalaat akornanni suliaqarnermi kalaalerpassuit ukiuni 15-init 20-nut suleqataasimapput, Naalagaaffiit Peqatigiit peqatigiiffiillu allat aamma Kalaallit Nunaanni politikkikkut namminersulernissamullu aamma pingaaruteqangaatsiarsimapput, Jens Dahl naggasiivoq.