ICC: Oqaatsit pillugit oqallinnerup tunuliaqutaa aajuna
- Oqaatsinut tunngatillugu pakatsisimasutut misigisimasoqarnera takusinnaavara, oqallinnerulli oqaatsinuinnaq kulturimuinnarlu tunngatinneqarnissaa mianersoqqutigerusuppara. Taakkumi pineqanngillat. Pakatsisimaarneq inuiaqatigiinni naligiinnginnedrmik ilinniartitaanerullu pitsaanngitsuuneranik pissuteqarpoq. Taakkuuppullu politikerit oqaluuserisariaqagaat. allat oqallisigineqartut angusaqarfiunavianngillat, ICC-p siulittaasua Aqqaluk Lynge oqarpoq.
- Inuiaavugut inuiannik allanik tikilluaqqusisut, aamma kalaaleqativut kalaallisut oqalussinnaanngitsut naligisatut isiginissaat nunattalu pitsaanerusumut inissinnissaanut kivitseqaataasussatut peqataasussaasutut isigisariaqarpagut.
Naaja Nathanielsenip kalaallinik danskinillu danskisuinnaq oqaluttunik sakkortuumik appisaluussisoqartarneranut assersuusiorluni ippassigami radioaviisimi oqaaseqarnerata kingorna oqaatsit pillugit oqallinneq sakkortuseriaqqippoq.
Tamannalu Randi Brobergip Partii Inuisinneerasup ima oqaaseqarfigaa:
- Isumaqarpunga kikkulluunniit inuiannguit taama ikitsigisut imminnut illersorniarlutik pisinnaatitaaffigigaat imminnut kinaassusertik illersussallugu. Nikarnarsarneqarnerumuna qaangerniarneqarneranik ersersitsineq, qallunaaluarnerunngilaq, Randi Broberg, Partii Inuit sinnerlugit Inatsisartunut ilaasortaasoq radioaviisimut oqarpoq.
Aqqaluk Lynge ICC-meersoq isumaqarpoq oqallinnerup "kalaalivinnut" "kalaaliviunngitsunullu" saatsinneqarnera uggornartuusoq. Oqallinnermi taama ittoq imaqanngimmat.
ICC-p siulittaasuata oqaatigaa inuiaat kalaallit nunarsuarmi nunap inuiinut allanut naleqqiullugit annertunerungaatsiartumik angusaqarsimasut. Kalaallit Nunaanni oqaatsit pisortatigoortumik atorneqartut ullumikkut marluupput, assersuutigalugulu Canadami naggueqatitta Inuit oqaatsitsik annaaleraat.
Nunasiaaneq qimareerparput ingerlaqqereerlutalu, taamaammat aamma ullumikkut oqaatsinut tunngatillugu akisussaaffigisarput allaaneruvoq. Kalaaliugut nukissaqarluta takutitsinissatsinnut pissutissaqarpugut.
- Kinguaariinni nutaani angajoqqaajusut ilungersornerusariaqarput, taamaaliornikkut oqaatsinut tunngatillugu akuersaartoqarneruniassammat. Imminut oqarfigisariaqarput: 'Maani nunatsinni kalaallisut oqalunnissarput pingaaruteqarpoq, aamma danskisut oqaluttuuvugut. Ilinniartitaanermut tunngatillugu aamma tuluttut oqalussinnaanissarput pisariaqarpoq.' Assersuutigalumi ullumikkut Ilisimatusarfimmi tuluttuunerusoq ingerlatsisoqarpoq, tamannalu eqqaamaneqassaaq, Aqqaluk Lynge oqarpoq.
Naalakkersuisut siulittaasuat Aleqa Hammond oqallisaasoq pillugu Radioaviisimit KNR.gl-imillu oqaaseqartinniaraluaratsigu ullumi iluatsinngitsoorparput.
