ICC: Obama-p qinigaanera Issittumi nunanut iluaqutaassaaq
Barack Obamap ukiuni tullinnguuttuni sisamani USA-mi præsidentioqqinnissaata nalaani Issittumi suleqatigiinnerup nukittorsarneqarnissaa ICC-mi præsidentip Aqqaluk Lyngep qilanaarivaa:
- Obamammi præsidentiunerata nalaani Nunat Inoqqaavisa Pisinnaatitaaffii Pillugit nalunaarummut USA-p akerliujuarsimanera kipitinneqarpoq, tamatumalu saniatigut USA-mi naggueqatigiit Inuit indianerillu pisinnaatitaaffii pingaarutillit siunissamilu politikkiulertussaq pillugu oqaloqatigineqartalersimallutik, Aqqaluk Lynge oqarpoq imalu nangilluni:
- Ukiummi sisamat kingulliit ingerlanerini Obama siuttuutillugu Issittumi Siunnersuisoqatigiinni sulineq siuariarsimaqaaq, Issittumilu Siunnersuisoqatigiinni nunap inoqqaavisa naligiittutut suleqataalernissaannik piumasaqaataat USA-p aallartitaasa tapersersortalersimallugu, ICC-p siulittaasua oqarpoq.
Ullumikkummi issittumi nunani naalakkersuisuusut saniatigut ICC, issittumilu innuttaasut kattuffii allat tallimat Issittumi Siunnersuisoqatigiinni ilaasortaapput.