ICC: Kalaallit Nunaat imminut mattutilerpoq
Inuit issittormiut suliniaqatigiiffiat 2017 tikillugu ukiumut 1 millionit koruuninik annaasaqartassaaq. Tapiissutit katillugit 4 millionit koruuninik ikilissapput. Tassa tapiissutisiarisartagaat massakkut 5,4 millionit koruniusut, 2017-imi 1,4 million koruuninngussallutik.
ICC-mi siulittaasoq Aqqaluk Lynge tupaallappoq isumaqarluni nunarput nunat assigiinngitsut akornanni suleqatigiinnerit mattunneqassasoq.
-Naalakkersuisut politikkerisaat, tassalu siunersuisut naalagaaffinnut peqataanertit taamaatissimagaat. Apeqqutigerusunnarpoq ilumut nunarput mattunniarneqarnersoq. Illersuisussaraluagullu taamaalillugit annaasassagut amerliartortinneqaannassapput aamma naggueqatigiit suleqatigiinnerat taamatut annertuumik sanngiillisarneqarniarpoq, Aqqaluk Lynge taama oqarpoq.
Taanna isumaqarpoq, ICC kalaallit inuiaqatigiinni pingaarutilimmik suliaqartoq, tusarniaanerit aqqutigalugit avatangiisit inuttullu pisinnaatitaafiit pillugit sulinermi aalaajangiisuusumik inissisimasoq.
Naalakkersuisut siunersuutitik attatiinnassappatigit, tamanna Aqqaluk Lyngep naapertorlugu tusarniaanerni innutaasullu peqatatinneqarnerannut kinguneqarnerlussaaq.
ICC-imut aningaassanut inatsit aqqutigalugu tapiissutigineqartartut 2007-miit nunanut allanut tunngasunut pisortaqarfimmiit isumatigineqalerput.
Aningaasanut inatsisissatut siunnersuut naapertorlugu Inuit Issittorliut Kattuffiannut tapiissutit 2008-miilli ikilisikkiartuaarneqarnissaat pilersaarutaagaluarpoq, ikililerinerli tassa aatsaat aallartinneqalerluni.
