ICC: Inatsisitigut Ataataqanngitsut Permanent Forumimi oqaaseqartinniarlugit qinnuteqarpugut
Inatsisitigut Ataataqanngitsut peqatigiiffittaassaat Nunat inoqqaavisa atugaat pillugit Naalagaaffiit Peqatigiinni isummersoqatigiiffimmi, Permanent Forumimi, oqaaseqarnissamut piffissalerneqarnissaat Inuit Issittormiut Siunnersuisoqatigiiffiata qinnuteqaatiginiarpaa. Inatsisitigut Ataataqanngitsut peqatigiiffiliornissaannut isummamik Nuummi aallarniisup, Tida Ravnip nuannaarutigaa.
Peqatigiiffiliornissamut isuma pinngorpoq, meeqqat Kitaani 1963 sioqqullugu inunngorsimasut, aamma Avannaani Tunumilu 1974 sioqqullugu inunngorsimasut inatsisit malillugit ataataqarnertik paasiniarsinnaanngimmassuk, aamma ataatavimminnit kingornussisinnaatitaanatik:
Inatsisitigut Ataataqanngitsut Nunat inoqqaavisa atugaat pillugit Naalagaaffiit Peqatigiinni isummersoqatigiiffimmi, Permanent Forumimi, oqaaseqarnissaannut Inuit Issittormiut Siunnersuisoqatigiiffiata, ICC-ip maanna periarfissinnialerpai. Isummersoqatigiiffik nunap inoqqaavinik qulinik ilaasortaqarpoq, nunap inoqqaavinut tunngassuteqartut pillugit taakku ukiumut ataasiarlutik ataatsimeeqatigiittarput.
Nunarsuaq tamakkerlugu ilaqarlutik Tida Ravnip qularutiginngilaa, Nunat inoqqaavisa atugaat pillugit isummersoqatigiiffik aqqutigalugu tamakku anguneqarsinnaanerat neriuutigaa:
Permanent Forumimi tassaavoq inuit issittumi najugallit oqaaseqarfigisinnaasaat, aamma taanna kattuffissuaq aqqutigisinnaagaanni, isumaqarpunga nunarsuarmioqatitsinnut sassarnissatsinnut periarfissatsialaasoq atorluartariaqagarput.
Nunarsuatsinni ullumikkut aamma meeraqarpoq inatsisitigut ataatassarsiorsinnaanngitsunik.
Naluneqanngilaq ilaqartugut inatsisitigut torersumik aaqqiivigineqanngisaannarsimasunik, taamaattumik aamma taamaaqataanik ajornartorsiuteqartunik ilassarsiornitsinni ersarinnerusumik inissisimalissaagut oqariartuuteqarnitsinnillu aaqqeeqqusisunik ujarlertoqaqqullugu oqariartuuteqarsinnaanerput tassani pingaarutilerujussuuvoq.
Naammaginninnarnani kisianni qanoq-iliuuseqarusussutsimik takutitsineq tassa uagut taanna qinernikuuvarput, allamiunut aamma takutikkusupparput imatut imatullu iliorsinnaavusi
Inatsisitigut Ataataqanngitsut Nunat inoqqaavisa atugaat pillugit Naalagaaffiit Peqatigiinni isummersoqatigiiffimmi qaqugu oqaaseqarsinnaatitaassanersut suli nalunarallarpoq.
