ICC FN-ip siunnersuisoqatigiivini ataatsimeeqataarngaartoq

Nunap inoqqaavinik FN-ip inuttut pisinnaatitaaffiit pillugit siunnersuisoqatigiivisa sapaatit akunneri marlungajaat matuma siorna ataatsimiinneranni peqataarngaartoqarpoq. Tamanna allorianerusoq pingaarutilik, ICC-p siulittaasua aamma ataatsimeeqataasuusoq Sara Olsvig isumaqarpoq.

Allattoq Kim Hinrichsen

juulip 30-at 2024 14:41

Nutserisoq Nutaarsiassaqartitsivik / Nyhedsredaktionen

Nunap inoqqaavisa Naalagaaffiit Peqatigiinni (FN) peqataanerunissaat qulequtaralugu FN-ip inuttut pisinnaatitaaffiit pillugit siunnersuisoqatigiivisa juulip 18-iani 19-ianilu ataatsimiimmata, nunap inoqqaavinik peqataarngaartoqarpoq. Tassa FN-ip inuttut pisinnaatitaaffiit pillugit siunnersuisoqatigiivini ilaasortat nunallu inoqqaavi pisortigoortumik toqqaannartumillu oqaloqatigeerngaarput.

Inuit Issittormiut Siunnersuisoqatigiiffiata (Inuit Circumpolar Council (ICC)) siulittaasua Sara Olsvig ataatsimeeqataallunilu arlaleriarluni saqqummiisunut ilaavoq.

Aamma atuaruk ICC-mi inuusuttut: Assigiinnik ajornartorsiuteqarpugut

ICC-p siulittaasua oqaloqatigeerngaarnertik pillugu tusagassiorfinnut nalunaarumminni ilaatigut ima allappoq:

- Nunat Inoqqaavi NGO-tut NGO-lluunniit aqqutigalugitt (suliniaqatigiiffiit pisortanit aqunneqanngitsut) imaluunniit naalagaaffiup sinniisaatut inissisimallutik maannamut peqataasarput. Ataatsimiineq una oqaluttuarisaanermut pingaaruteqarluni ilannguppoq, nunap inoqqaavisa FN-imi peqataasinnaatitaanerisa akuerineqarnissaannut alloriarnerulluni, taanna oqarpoq.

Ukiorpassuarni suleqataajuartoq

Nunap inoqqaavisa FN-imi peqataanerunissaannik suliniut FN-ip nunat inoqqaavisa pisinnaatitaaffii pillugit nalunaarutaannik tunngaveqarpoq. Nunap inoqqaavi pisuni namminerminnut sunniuteqartuni aalajangiisoqassatillugu peqataasinnaatitaasut FN-ip nalunaarutaani tassani uppernarsarneqarpoq.

ICC SUUA?

ICC Alaskami 1977-mi pilersinneqarpoq.
ICC tassaavoq nunat tamalaat akornanni naggueqatigiit inuit 180.000-it missaanniittut Alaskameersut, Canadameersut, Kalaallit Nunaanneersut Chukotkameersullu (Ruslandimi) sinnerlugit suliniaqatigiiffik.
Nunat tamalaat akornanni Issittoq pineqartillugu, ICC Inuit pisinnaatitaaffiinik siuarsaanermik suliaqartarpoq.
ICC Issittumi Siunnersuisoqatigiinni ataavartumik ilaasortaavoq.

ICC Nunap inoqqaavisa FN-imi peqataanerunissaannik suleqataajuarpoq. Suleqataajuarneralu sooq taama pingaaruteqartiginersoq, Sara Olsvigip tusagassiorfinnut nalunaarumminni erseqqissarpaa:

- Nunap inoqqaavisa namminneq aqutsisuisa naligiimmik peqataanissaat Naalagaaffiit Peqatigiit suli qulakkeersimanngikkaluaraat, inuit pisinnaatitaaffii, silap pissusia pillugu iliuuseqarneq, uumassusillit assigiinngissitaarnerat, avatangiisinik illersuineq allarpassuillu pillugit Naalagaaffiit Peqatigiinni sulinermi periuutsinut ineriartortitsinermut nunap inoqqaavi annertuumik tunniussaqarsimapput, taanna oqarpoq nangillunilu:

- Nunat inoqqaavisa tunniussaasa takutippaat, nunat inoqqaavi kisiisa eqqarsaatiginagit Naalagaaffii Peqatigiit inuiaallu eqqarsaatigalugit nunat inoqqaavisa naligiimmik peqataatinneqarnissaat sooq taama pingaaruteqartigisoq. NGO-tuunngitsoq namminnerli aquttutik aqqutigalugit, ICC-p siulittaasua Sara Olsvig tusagassiorfinnut nalunaarumminni aamma allappoq.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.