ICC: Cairnimut siunnersortaanngilagut

Cairn Energyp misiliilluni qilleriniarneranut ICC tusarniaavittut suleqataarusunngilaq, ICC isumaqarami tusarniaaneq suleriaaserlu naammanngitsut.

Ukiormanna juunip pingajuani qillerinissat tungaannut ICCp Cairn Energyllu pigisaata Capricornip akornanni tusarniaanerup akissuteqarfigineqarnerani erserpoq.

Capricornip qillerinissamik qinnuteqaamminni kukkullutik allappaat ICC tusarniaavissatut suleqataasussaq, tamannalu ilumuunngilaq.

- Tusarniaanermut peqataasimanermut oqaaseqarneq taanna ingasalluinnaqqissaarpoq, paasisitsiniaallutinuku organisationit ilagalugit immikkut ataatsimiisinnikuugaatigut, ICC-p siulittaasua Aqqaluk Lynge oqarpoq.

ICC-p ukiorli kingulleq uparuartoreerpaa uuliaatileqatigiiffiit qillerinissamut akuerisaanerannut tunngavilersuutit naammanngitsut. ICC-lu malillugu tusarniaanerit siunnersueqatigiinnerillu pipallappallaarput, isumaqarlutillu suliffeqarfissuit naliliineri naammanngitsut piffissakilliorneq sullissisussaleqinerlu pineqarunarluni.

Tamaattumik ICC-p Cairn Energymit suleqatiserineqarami naaggaarpoq, paasisitsiniaallunilu naapinnernut arlaqanngitsunut ilaallutik.

Cairn Energy ICC-mit attavigineqareerluni kukkuneq iluarsivaa. Kisianni siunnersortitut soormita ICC suleqataarusunngitsoq?

- Ukua immikkullu isumasiuinerit misissuinerillu annertunerujussuarmik pisussaapput. Tamakkulu pinissaannut uagut ullumikkut ICC-mi tamakkuninnga suliaqartut inuit pingasuinnaavugut. Taavalu ilisimasallit Canadami Alaskamilu naggueqatigut kattuffiillu tusarniaqqaarlugit uterfiginiartarpagut, Aqqaluk Lynge oqarpoq.

- Ullumikkut piffissaq annikittuararsuaq atorneqaraangat isumaqarpunga sukumiisumik suliarinissaanut periarfissaqanngitsugut, Aqqaluk Lynge oqarpoq.

Tamakku peqqutaallutik ICC ullumikkut oqartussaasunik suleqateqarpoq inatsisit allanngortinniarlugit. Siulittaasullu iluarsiissuteqartoqassasoq neriuutigaa inassutigalugulu sakkortunermik uuliasiortunut piumasaqartoqartalissasoq.

- Nunatsinni atuiniartunut piumasaqaatit suli sakkortunerujussuusariaqarput, aammalu aningaasatigut piumasaqarfigineqarlutik, imatut imatullu aaqqissuussinissamut minnerunngitsumillu innuttaasut iluameersumik paasitinneqarnissaat anguniarlugu sulineq tamaanga killeqqavoq, Aqqaluk Lynge oqarpoq.

Aqqaluk Lynge isumaqarpoq qillerinernut akuersissutinik tunniussisoqartinnagu sukumiinerusumik siunnersuisinnaasunik pilersitsisoqartariaqalersoq. Tamannalu ICC-p Naalakkersuisut augustimi naapeqatigiilerunik eqqartorniarpaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat