IA-p imminut toqunneq meeqqallu ajutoortarnerat pinaveersaarniarlugit aallaasinut inatsit sukaterusukkaa

Inuusuttuaqqat pingasut 18-it inorlugit ukiullit Narsami sapaatip akunnerata siuliani aallartoornermik ajutoorput. Nukappissanit pingasunit ataaseq qoorortuuaqqamik aallartoornermi ikilingaatsiarpoq, ajoquseraluarnili inuunini annaappaa.

Kikkulli tamarmik iluatsitsineq ajorput.

AAMMA ATUARUK Politi: Niårig døde af vådeskud

Nunatsinni meeqqanik aallartoornermi ajunaartunik arlalinnik assersuutissaqarpoq.

Inuunermik annaassiniarluni aallaasit parnaarsaatilerneqassasut

Aallaasit meeqqanut tarnimikkullu sangiitsunut pissarsiarineqarsinnaanerat ajornarneruleraluarpat aallaammik aallartoornerit imminut toqunnerillu amerlasuut pinngitsoorneqarsinnaagaluartut, Aaja Chemnitz Larsen (IA) Folketingimi sapaatip akunnerata siuliani oqaluarnermini erseqqisaatigaa.

Taamaammat aallaasit parnaarneqartaleraluarunik pisut assersuutigalugu Narsami sapaatip akunnerata siuliani nalaanneqartutut ittut immaqa pinaveersaarneqarsinnaagaluartut isumaqarpoq:

- Aallaasit isumannaatsumut parnaarneqartartumiitsinneqartalernissaat siunnersuutigaara. Nunatsinni piniartuunermik piorsarsimassuseqarnerput pissutigalugu angerlarsimaffimmi aallaaseqartut amerlapput, tamannalu ataqqissavarput, Aaja Chemnitz Larsen oqarpoq.

Taassuma aallaasit eqittaataannut parnaarsaammik taaneqartartup piumasaqaataalernissaa oqaatigaa. Taanna atorlugu aallaasimik atuinissaq ajornarnerulissaaq, tamatumalu atulersinneqarnissaa ajornaallunilu akikitsuuvoq.

- Taamaalilluta imminut toqunnermik aallartoornermillu ajutoornernik ataatsimoorluta pinaveersaartitsisinnaavugut.

Aallaasit eqittaataatigut parnaarsaatilerneqarnissaanut piumasaqaateqalernissamut isumassarsiaq aallaasimik atuisikkusunngisap siullertut ajornaatsumillu atuinissaanut ajornarnerulersitsinissamik aallaaveqarpoq.

Tamanna meeqqat tarnikkullu sangiinnerusut imminut toqunnissamik aarlerinartumiittut eqqarsarluarnissaannut aallaammillu uninngatitsiinnarnissaannut immaqa eqqarsalersitsisinnaasoq, Aaja Chemnitz Larsen naliliivoq.

Meeqqat inuusuttullu ilisisunut ilaasariaqartarnerat unissasoq

Aaja Chemnitz Larsenip sammisamik oqallisigisassanngortitsinissaa nammineq migisimasaanik aallaaveqarpoq. Taassumami aallaammik aallartoortoqarnera imminut toquttoqarneralu nammineq nalaannikuuai:

- Meeqqatta ikinngutiminnik imminut toquttunik annaasaqarneranni aatsaat eqqarsaatigilerpara tamanna nammineq inuusuttuulluunga aamma nalaannikuuvara, ikinngutillu ilisaaneranni najuunneq allanut naleqqiullugu nalinginnaaneruvoq.

- Inuiaqatigiittut imminut toquttoqartarneranik ikilisaaniarnermik iluaqutaasumik iliuuseqannginnerput eqqarsarnalaarpoq. Aallaammik aallartoornermik ajutoornerit ilaqutariinnut tamanut alianartut tassani ilaapput, Aaja Chemnitz Larsen oqarpoq.

Politiit: Aallaasit tigusariaannaanerat ajornartorsiutaavoq

Inuit aallaammik tigummisaqartariaqanngitsut tiguseriaannaanerata ajornartorsiutaanera Kalaallit Nunaanni Politiit ilisarilluarsinnaavaat.

- Aallaasit pissarsiareriaannaasumi atortariaannaasumillu uninngatinneqarnerata ajornartorsiutaanera Kalaallit Nunaanni Politiit misigisarpaat. Uani meeqqat aallaasimik pissarsillutik alianartumik imminnut aallaasoortut eqqarsaatigaakka.

Kalaallit Nunaanni Politiit pisortaat, Bjørn Tegner Bay oqarpoq, nangillunilu:

- Aamma imminut toquttut imminullu toqunnissamik siorasaaruteqartut aallaaminik atortariaannaasumik pissarsiaqariaannaasut nalaattarpagut, taakkulu imminut toqunnissaannut periarfissaq annertunerusarluni. Aallaatsip eqittagaani parnaarsaateqartuuguni meeqqat aallaammik atuinissamut sukataarusujussuaqqaartigatik atuisinnaanavianngillat.

Aaja Chemnitz Larsen aallaasinut tunngatillugu isumannaannerulersitsinissamik isumassarsiaqarnera politiit pisortaata isumaqatigaa:

- Aallaasimik atuinissamik ajornarnerulersitsinissamut peqqussutit arlaat kissaatigingaatsiarparput. Aallaasit qanoq parnaarneqarneranut tunngatillugu uannut pingaaruteqarpallaanngilaq, atuisikkusunngisamut ajornakusoorneruppat naammappoq, Bjørn Tegner Bay.

Nunatsinni aallaasinut parnaarsaateqalernissamut piumasaqaat atuutilissappat inatsisissatut siunnersuut Danmarkimi akuerineqaqqaassaaq, aallaasinummi inatsit Folketingip ataaniippoq.

Taamaaliortoqarsinnaanissaanilli siunnersuut Inatsisartunit taperserneqaqqaassaaq.