IA aggersaavoq: Naalakkersuisunngortussat saqqummiuteriaannanngorpagut

Naalakkersuisoqatigiinngortussanik innersuussisariaannanngorpugut.

Inuit Ataqatigiit tusagassiuutinut taama nalunaarpoq. 

Partiit naalakkersuisoqatigiinngortussat ullumi tallimanngornermi atsioqatigiissapput. Tamanna tusagassiortunut Nuummi Katuami inersuaaqqami sassarnermi pissaaq.

- Atsioqatigiinneq nalliuttorsiorpalaartumik pisssaaq; erinarsortoqarlunilu isumaqatigiissutaannik saqqummiisoqassaaq, IA allappoq. 

- Naalakkersuisunngortussatut innersuunneqartussat aamma saqqummiunneqassapput. Kikkulluunniit najuussinnaapput, covid-19-ilu pillugu killilersuutit soorunami malinneqassallutik.

AAMMA ATUARUK Naleraq naalakkersuisoqatigiinnissamut isumaqatigiinniarnerit pillugit: Qanilliartorpugut

Naalakkersuisoqatigiinngortussat apriilip qiteqqunnerata kingunitsiannguagut isumaqatigiissusiorumaartut, Inatsisartunut qinersinermi ajugaarujussuartoq, tassa Inuit Ataqatigiit siulittaasuat Múte B. Egede, qinerseriitsiarnermi nalunaarpoq.

Peqqissaarnissarli piffissamit pingaarnerusoq, tamatuma kingorna erseqqissaavoq.

Naalakkersuisoqatigiit patajaatsut pilersikkusukkai

Demokraatit Inuit Ataqatigiinnut tallimanngornermi apriilip ulluisa qulingiluaanni isumaqatigiinniarunnaarput.

Siumut tamatuma kingorna marlunngornermi aamma isumaqatigiinniaqataajunnaarpoq.

Naalakkersuisoqatigiit patajaatsut ukiuni sisamani issiasussat pilersikkusullugit, Inuit Ataqatigiit siulittaasuata oqaatigaa. Siumullu naalakkersuisoqatigissallugu patajaatsuunavianngitsoq, Múte B. Egede naliliivoq.

AAMMA ATUARUK Atassut: Naalaaffeqatigiinnermut apeqqut akunnaffiuvoq

Taamaammat Inuit Ataqatigiit Atassut Nalerarlu kisiisa isumaqatigiissuteqarfiginiarniarpai.

Siumut Inuit Ataqatigiillu ataatsimik, tassa Kujataani Kuannersuarni aatsitassarsiulersaarnermik, imminnut ungasiffeqarput.

Australiamiut aatsitassarsioqatigiiffiat, Greenland Minerals, Kuannersuarni aatsitassanik qaqutigoortunik uranimillu piiaarusupput.

Siumut Demokraatillu aatsitassarsiulersaarnermut tapersersuisuupput, pissutigalugu aatsitassarsiutileqatigiiffiup oqarnera naapertorlugu tamanna nunatta karsianut koruuninik milliardilikkaanik isaatitsissutaasinnaallunilu piffimmi suliffinnik pilersitsissutaasinnaalluni.

Suliniutilli piviusunngunnginnissaa Inuit Ataqatigiit isumaginiarpaa.