IA: Siumut naalakkersuisoqatiginissaa ilimanaateqanngilaq

Partiit siulittaasui Kuupik Kleist, IA aamma Hans Enoksen, Siumut - nutaanik naalakkersuisuliornissami manna tikillugu siulitaasussatut ilimagineqarnerpaasut ippassaq KNR TV-ikkut apeqqarissaarneqarneranni tamanna erserpoq.

Hans Enoksenip Inuit Ataqatigiinnik suleqateqarnissamut isumaqatigiinngissutaasut arlariit saqqummiuppai.

Inuit Ataqatigiit akissarsiaqqortunerit akileraarnerusalernissaannik siunniussaqarnertik qimassimavaat aammalu Inuit Ataqatgiit uranimik piaasoqarnissamik akerliunerat Hans Enoksenip eqqaavai.

Aatsitassanik piiaanissanut aammalu Maniitsup eqqaani alumiiniumik aatitsiviliornissamut IA akerliunerarlugu Hans Enoksen oqarpoq.

Aatsitassanik piaanermi Kalaallit Nunaata aningaasarsiorneranut sunniuteqarluartussaanera Kuupik Kleistip erseqqissarpaa oqarlunilu nammineq partiimi aatsitassanik piianissaq tapersersormagu.

Alumiiniumik aatsitsiviliornissaq pillugu Kuupik Kleist oqarpoq, inatsisartut Alcoamut piumasaqaateqassasut, Alcoap alumiiniumik aatsitsiviliorneranut aningaasaliissutigineqartut utertinnissaat qulakkeerneqarnissaat anguneqartariaqarmat, Kuupik Kleist oqarpoq, erseqqissaqqillugulu naalakkersuisut Siumukkunnit aqunneqartut naalakkersuisoqatiginissaannut IA-p naatsersuutiginngimmagu.