IA: Politikkikkut sulinerup killiffia
Sammisarpassuit ilagaat Nunatsinni urani. Naalakkersuisuutitaqalersut uranimut akuersaanngilluinnarnerup atorunnaarsinneqarnissaanik ulapputeqaleruttortut, IA-p partiitut ukiorpassuarni tamatumunnga isummersimanini attatiinnarniarlugu aalajangiusimavaa. Akuersaanngilluinnarnissaq IA-p politikkianut ilaalluinnarpoq, tamatumalu allanngortinneqarnissaa pilersaarutigineqanngilaq.
IA-ttaaq Nunatsinni imminut pilersornerup siuarsaavigineqarnissaa pilersaaruteqarfigaa. Tamanna Kujataani nunalernermi uumasuuteqarnermilu nioqqutinik pingaarnertut pissaaq. Najukkami assartuinermut akigititat appartinneqarnerisigut tamanna ilaatigut anguneqarsinnaavoq. Aammattaaq inuussutissat nunatsinnut eqqussorneqartut CO2-mut akitsuusersornerisigut imminut pilersornerulernissaq qanillattorneqarsinnaavoq.
Qaasuitsup Kommuniani isumaginninnikkut sullissinerup kigaappallaartup sullissinermik sukkanerusumik pingaartumillu eqaannerusumik taarneqarnissaa IA-p ilungersorluni sulissutiginiarpaa. Pissutsit maannakkut atuuttut atuutsillugit, innuttaasunut kommunimullu akisuallaaqaaq.