IA-p Siumut Naalakkersuisooqatigiumanngilaa
- Taanna ajornakusoortorujussuussaaq. Inuit Ataqatigiini misilittakkavut naapertorlugit, Siumup aqutaanik naalakkersuisoqaataanissaq isumaqarpunga ajornakusoortoq. Innuttaasut akornanni allatut ingerlatseriaaseqartoqarnissaanik kissaateqarneq tusaaniartariaqartoq, isumaqarpunga, Kuupik Kleist oqarpoq.
Inuit Ataqatigiit siulittasuat suleqatiserineqaqisoq taamaalilluni erseqqissusiliorpoq, Inuit Ataqatigiit Siumullu Naalakkersuisooqatigiiniissaat itigartillugu, oqarluni qineqqusaarnerup nalaani Siumukkut suleqatigiikkusussuseqarsinnaanerannik malunnartoqarsimanngitsoq.
Aamma erseqqissarpaa, Siumukkormiut siulliullutik Inuit Ataqatigiinnik, qinersinerup kingorna partiini annersaalersussatut ilimagineqartunik, suleqateqarsinnaaneq itigartereeraat.
Inatsisartunut qinersinissamut sapaatit akunneriinnangupajaartoq naalakkersuinikkut suleqatigeeriaatsit allanngorsinnaneri erseriartorput. Maannamut naalakkersuisuutitaqartut Atassut sisamanngormat oqarput, Inuit Ataqatigiinnik suleqateqarsinnaallutik. Tamannalu Inuit Ataqatigiinnit nuannaarutigineqarpoq. Kuupik Kleistili oqarpoq, amerlanerpaanik tunuliaqueqarnissaq pingaartikkitsik.
- Sapinngisamik amerlanerussuteqarluarluni Innuttasullu amerlanerpaat tapersersorsinnaasaannik ingerlatseriaatsimik tunngaviliisunnaagutta kikkunnut isumaqatigiinniarnissamut ammavugut, Inuit Ataqatigiit siulittasuat oqarpoq.
Aamma Siumut?
- Aamma Siumut, Kuupik Kleist akivoq nangillunilu:
- Tassa Siumut siuttuutillugu naalakkersuisooqataasinnaanerput qularnartupilussuuvoq. Kisianni qinersisartut piumaffigippatsigut, uagut isumaqatiginniarnerni siuttuussasugut, taava amerlanerpaanik tunuliaquteqarluta naalakkersuisunngortitsinissarput siunerfigaarput, Inuit Ataqatigiit siulittaasuat oqarpoq.