IA-p saamiatungaanut sangutinneqarnissaa siulittaasunngorniat sulissutiginiarpaat
- Isumaqarpunga pitsaanerusunngortissinnaasavut arlaqartut. Aamma ilaatigut nunatta iluani pissutsinut allanngoriartupilooqisunut, aammalu aaqqiissutissanik suleqatigiiffeqartariaqarnermik pisussaaffilerneqarnitsinni isumaqarpunga tassani naalakkersuinikkut allaanerusumik ingerlatsissasugut, aamma partiinut allanut suleqateqarsinnaaneq eqqarsaatigalugu, Inuit ataqatigiit siulittaasorigallagaat, partiip siulittaasussaatut sassartoq, sinnerlugit Inatsisartunut ilaasortaq Aqqaluaq B. Egede, taama oqarpoq.
Taassumami siulittaasunngussaguni partiip saamerlertut ingerlaqqinnissaa suliniutiginiarpaa. Aammali tamanit katersuuffigineqarsinnaasumik naalakkersuinikkut toqqaammavilimmik misissukkallu tunngavigalugit ataatsimoorussaqarnissaq siunertariniarpaa.
- Tassani aamma inuiaqatigiinni katatarilersimasatsitut oqaatigisinnaasavut, tassa inuit aningaasarsiornikkut artornartumik inissisimasut periarfissamik nutaamik toqqammavilerneqarnissaat tassuuna suliariniarpakka, Aqqaluaq B. Egede oqarpoq.
Folketingimut Inatsisartunullu ilaasortaq, aamma siulittaasunngorusulluni sassartoq, Sara Olsvig, partii saamiatungaanut sangunissanik suliniuteqarniarpoq.
- Saamerliuniarnermi siunnerfigut qanorpiaq ittuunersut, pissakinnernik illersuiniarnermi, akileraartarnikkut anguniagaqarnitsinni naligiinnerusumik inuiaqatigiinni inuuneqarnissap tungaanut taakkua erseqqissarnissaat pingaaruteqarpoq, Sara Olsvig oqarpoq.
Tassami Sara Olsvig aamma Aqqaluaq B. Egedetulli misigisimavoq, partiip saamerliusutut inissisimanera, pissakinnernik illersuisuunera, kulturitsinnillu ataqqinnittuuneq aanngasittarsimassut.
- Partiit tamakkerlugit uanga isummanni ammaffigissavavut, suleqatiginissaat, tassanilu suliniut anguniagaq tassani qitiussaaq, tassalu innuttaasut inuiaallu pitsaanerusumik atugaqalernissaat, Sara Olsvig oqarpoq.
Partiillumi immikkuullarittuunerata ersarissisinnissaa, maanna illua tungiliuttuunermi periarfissaasoq, Inuit Ataqatigiit ukiuni kingullerni arfinilinni siulittaasorisaata, Kuupik V. Kleistip oqaatigaa:
- Soorunalimi uanga siulittaasuunermi nalaani inuiaqatigiinni katersuutsitsiniarsimavunga annertuumik, aammalu Naalakkersuinikkut siuttuunerup isumagivaa isummanik sapinngisamik assigiinngitsunik katerititsinissaq. Taamaattumik assigiinngissuteqartarpoq naalakkersuisuni siuttuuneq imaluunniit illuatungiliuttuuneq. Illuatungiliuttuunerup nalaani partiit ilisarnaatai erseqqinnerusumik saqqummiussorneqartarput, taanna eqqumiittortaqanngilaq, kisiannili aamma siuttuuniaraanni tunngaviusussaq tassaassaaq inuiaata ataatsimut sullinneqarnerat, Kuupik V, Kleist oqarpoq.